L’hestóricu dirixente mineru d’UXT paez la punta l’iceberg d’una trama muncho más amplia, responsable, pente otres coses, del fin de la minería n’Asturies

La reciente detención del secretariu xeneral del SOMA-FITAG-UXT y cabezaleru del sindicatu mineru asturianu demientres 30 años, José Ángel Fernández Villa, pon enriba la mesa la cuestión de la corrupción pente la clas política y síndical asturiana  -remembremos que los asturianos encausaos por confechu, prevaricación y malversación durante el 2016, unos 59, suponen el 9% del conxuntu estatal-.

La gravedá d’esti casu reside na so repercusión en tol texíu social y económicu’l país, ya que non solo se trata de corrupción, blanqueu de perres, prevaricación, desvíu y ocultación de fondos, sinon qu’esta triba d’actuaciones llevaron a la ruina y al preslle de la minería asturiana, con tolo qu’ello implica.

“Nun ye namás Villa y Montepío. El casu ye saber quién cobró y cuanto por cada pozu mineru que presllaron, ya’l papel d’Areces y del restu la mafia’l SOMA-PSOE” declaró Arturu Xosé Bermeyu, Secretariu Xeneral d’Andecha Astur, organización que reclama una investigación seria y esaustiva, qu’algame a tolos los estamentos y na que los implicaos asuman so responsabilidá nos fechos.

l’actual llínia d’investigación centrase’n determinar l’orixen de los 1,4 millones d’euros que se regularizaron durante l’amnistía fiscal de 2012, operación que Villa realizó en compañía d’otros dos de los detenios por esti tema.

Llucía F. Marqués

This work is licensed under a Creative Commons Attribution 4.0 International License.