@EltiempunAsturies
Bonos díes, bona xente.
Alborecemos col cielu poco nuboso pero dalgo empuercáu de nubosidá alta con unes temperatures que tan alrodiu de los 14ºC, rexistrándose nel puirtu Payares 14,2ºC.
Güei vamos tener el cielu poco nuboso, sicasí surdirán nubes altes, sobre too pela tarde que van dexanos a última hora’l cielu nuble. Les temperatures másimes n’ascensu moderáu y l’aire sedrá sele ya variable.
Nel prósimu riscar va cruzamos un frente fríu mui activu que vien de la mano d’una potente borrasca situada nel mar del Norte. Les precipitaciones van ser abondoses pero tenderán a remitir al alborecer d’oeste a este. Les temperatures al pasu del frente descenderán bultablemente y l’aire gallegu va soplar con muncha fuercia en puntos de la costa y zones altes de montaña, amás mos pue dexar mui mala mar. Durante la mañana, a parte de remitir les precipitaciones una vegada que pase’l frente, van dir abriéndose dellos claros pero pela tarde mos llegarán nubes más organizaes que puen dexanos dellos xarabatos intermitentes ya dispersos.
El vienres l’aire picará más a componente noroeste ya tendremos intervalos nubosos entemecios ente dellos claros que mos van dexar xarabatos intermitentes pudiendo venir acompangaos de truena pel llitoral ya inclusu dexar dalguna nevada testimonial nes cumes más altes de Picos d’Europa. Les temperatures en descensu. L’aire seguirá soplando con fuercia na costa y zones altes de la cordelera.
El sábadu escamplará y amenorgará l’aire con un descensu de les temperatures mínimes y el domingu yá van recuperase nidiamente les másimes que se van averar a los 25ºC y el cielu seguirá poco nuboso.
Que paséis un bon miércoles collacies ya collacios.
Semeya que mos l’apurre Consuelo Vázquez del pueblu de Coañana en Quiros.
This work is licensed under a Creative Commons Attribution 4.0 International License.
