La deficiente xestión de FEVE debuxa un panorama llaceriosu de cancelaciones, averíes, falta de presonal, hores estres y perdes que faen temer pol futuru de la empresa

FEVE preslló l´exerciciu  con un 13% menos de viaxeros, consecuencia lóxica de la cancelación de 2.472  de los servicios programaos. Dende A.A. denuncien que “Cerca´l 70% de les cancelaciones de trenes de FEVE en tola so rede prodúcense n´Asturies, según datos del comité d´empresa.” A estes supresiones hai qu´amestar los retrasos continuos y la ralentización del serviciu: la istrución cabera a los maquinistes obliga a amenorgar la velocidá en venti tramos de la rede por mor del mal estáu de la vía.

Too ello vendríe motivao pola falta de caltenimientu de la maquinaria, que na so mayoría tien más de 20 años, la cayía de les inversiones en caltenimientu de la vía, -d’once a un millón d´euros- y la deficiente política de contratación de presonal, tanto maquinistes como mecánicos, que fasta agora solventen a bas d´hores estres, que sigún denuncien los trabayaores non siempres son remuneraes comu correspuende.

La integración de FEVE dientro de RENFE Viaxeros ya´l cambeu de xestión impuestu tracen un camín qu´implica un nidiu abandonu de lo que foi un serviciu públicu exemplar y faen albidrar una intención privatizadora de los percorríos rentables y el desdexamientu del restu, cola consiguiente desconexón territorial del nuesu país.

Por cuenta d´ello, Andecha Ástur, faciéndose ecu de les solicitúes rializaes polos trabayaores reclamó ante´l Senáu, a traviés d´EHBildu socios de coalición en Los Pueblos Deciden, un plan de modernización pa FEVE n´Asturies  y la reparación del material. Treslladaron tamién delles entrugues so la situación y les medies puestes en marcha, reclamando una actuación inmediata que permita amenorgar les averíes nes maquines y nes infraestructures.

This work is licensed under a Creative Commons Attribution 4.0 International License.