Flavio Lorenzo Sánchez disfruta atropando momentos fugaces y xelándolos nel tiempu. El so trabayu consiste en cazar imáxenes, pa tresmitir emociones y guardales como una ayalga.

Dende mui nuevu, Flavio sintió l’atracción pol arte de facer semeyes. Poro, en finando l’institutu, entamó a estudiar Fotografía y Illuminación. Lo que más-y presta ye capturar paisaxes y retratos.

“Munches vegaes, nun busques les imáxenes que decides retratar, alcuéntresles nel to camín”, cunta Flavio. “Ye verdá que puedes tener idegues pa creyar la semeya que quiés, pero munches imáxenes tan ehí, esperando que les caces. Esta ye una sensación perguapa, porque tas plasmando daqué que ta sucediendo nesi intre y que nun va volver a pasar.”

El procesu creativu de buscar una semeya específica tamién existe y pa ello hai de cuntar coles regles básiques d’encuadre y composición. “Llueu, la decisión de romper eses regles o seguiles depende de lo que quieras algamar.”

Nes semeyes a persones, Flavio alcuentra grandes diferencies pente modelos profesionales, que tienen actitú y habilidá pa posar y nun necesiten instrucciones, y les persones que nun tan avezaes a posar. “Nesti casu, hai de buscar la manera de que la persona s’afaye bien, pa poder capturar xestos y momentos naturales. Descubrir cuáles son les postures naturales nesa persona tamién ye un gran gabitu pa captar la so personalidá.”

Otra de les coses que más-y presten ye la improvisación venceyada a esti trabayu. Inda cuandu lleva un diseñu preconcebíu, déxase llevar pol momentu y adáptase a la situación pa facer la meyor semeya. Los axustes de lluz, color y otres cuestiones pueden entamarse nel procesu de postproducción. Inclusu, los diferentes enfoques y téuniques “tan ehí pa conocelos, pero tamién pa rompelos si ye necesariu”.

Nes semeyes de paisaxes, el procesu ye asemeyáu. “Puedes dir a la gueta d’una semeya específica, nun momentu determináu, con unes condiciones de lluz esperaes, o capturar momentos únicos y adaptate a lo que ta sucediento na redolada.” Esto permíte-y atropar momentos estimulantes y convertise nun artista versátil y apasionáu.

Susana Sela

This work is licensed under a Creative Commons Attribution 4.0 International License.