Los problemes d’años anteriores siguen ensin iguar, el gobiernu de Barbón sigui ensin faceyos casu y agora, enriba, la seca menacia con estrozar la produción.

“Si esto sigue asina, pue que pa la prósima llexisllatura nun faiga falta Conseyería de Mediu Rural”

Más de 40 tractores acompangaben a la concentración de trabayaores del campu qu’aconceyaben ayeri delantre la Sede de la Conseyería de Mediu Rural. Ellí abrieron grifos y dexaron cayer llitros de llechi, en protesta polos baxos precios que se paguen al productor, unos 0’40 € por llitru. Representantes sindicales entraron a falar de los sos problemes colos responsables de la Conseyería, pero otra vuelta se-yos negó audiencia “dicen que tan mui ocupaos, que tienen munches reuniones…”. Una de les reuniones que teníen convocada pa estos díis yera precisamente colos sindicatos ganaderos; punxéren-y fecha ante l’avisu de movilizaciones -non anantes, seique se pidiere poles bones- pero desconvocárenla unos díes anantes de la fecha marcao pa ella. 

Precios de produción inasumibles, xúnense al baxu preciu que se-yos paga por unos productos qu’aporten al consumidor a precios esponencialmente más altos, la xubía de bienes de consumu nun aporta a quien los produz, la “Llei de la Cadena Alimentaria” nun se cumple, naide impide que ten vendiendo los sos productos “a pérdida” y la seca vien agravalo tou. 

L’ochenta por cientu de les ganaderíes asturianes tan en manes de xente de más de sesenta años y la situación nun afala al relevu xeneracional. “Si esto sigue asina, pue que pa la prósima llexisllatura nun faiga falta Conseyería de Mediu Rural” resumía José Ramón Alba, ‘Pachón’, del sindicatu UCA.