L’homenaxe tuvo dos partes, la primera d’ella al par del monumentu a los mártires de Carbayín, 24 homes asesinaos pola República Española cuando la Revolución d’Ochobre ya finare “¿Quién yeren estes persones? ¿Yeren representantes importantes de la Revolución? Non, yeren xente normal, asturianos que participaron na Revolución ensin especial responsabilidá, unos más ¿porqué los mataron y porqué los mataron a sangre frio? lo que se quería yera tresmitir una idega al conxuntu del Pueblu Asturianu, simplemente, España nun perdona.” 

Llucía fexo un paralelismu pente aquella situación y la que viven agora les 6 de la Suiza “salvando les distancies, el modus operandi ye’l mesmu, l’escarmientu al azar d’unes víctimes que llucharon polos sos drechos pa meter miéu al restu y que nun alcen la tiesta. España nun perdona” .

Tamién fizo rescamplar l’abandonu d’estos mártires por parte de la izquierda española, a cuyes organizaciones pertenecíen: PSOE, PCE, CNT… aprofitando pa facer ver comu xente de mui estremaes sigles y visiones polítiques foron quien a acomuñar col únicu oxetivu de guetar un meyor futuru con Asturies y la clas trabayaora comu marcu. 

Ya al par de la tumba de Belarmino Tomás y tres de confirmar qu’otra vuelta foron arrincaes les plaques n’alcordanza al que fore Presidente de la República Asturiana d’Obreros y Campesinos, Llucía aporfió na traición de la República Española, que dempués de pautar con Tomás una retirada pacífica protagonizó una xabaz represión. “Nun mos rendimos, pautamos y traicionáronmos, pero quieren vendenoslo como una derrota en llugar de comu la traición que foi porque mos quieren derrotaos ya ensin enfotu” recalcó, sollertando del pelligru de creyer los mensaxes de desenfotu tamién actuales, qu’afalen a la desmotivación y al abandonu de la llucha. 

Darréu ca una de les intervenciones interpretóse a gaita La Flor del Agua y realizáronse sendes ufriendes florales nun ambiente solemne y emocionáu.