El Reguerada festexa esti añu la so segunda edición, endolcáu n’arte, lliteratura, música y productos asturianos
Los díes 13, 14 y 15 d’ochobre, Candás agospió la segunda edición del Reguerada Fest, un eventu que ta se convirtiendo nun referente pa les empreses asturianes. Con un mercáu y actividaes pa tolos públicos, ye la oportunidá perfeuta pa somorguiase nel arte, la lliteratura y la cultura asturiana.
El nome l’eventu ye un homenax a Antón de Marirreguera, autor de la que se considera la primer obra lliteraria conservada n’asturianu, el Pleitu ente Uviéu y Mérida pola posesión de les cenices de santa Olaya (1639). Una de les carauterístiques más notables del eventu ye la xuntura de les disciplines artístiques col mundiu la empresa y la comunicación, amuesando que l’asturianu, arriendes de ser el vehículu tresmisor d’una cultura, ye tamién una poderosa seña d’identidá.
El Reguerada espárdese per diferentes centros de Candás. Esti añu, el Muséu Antón cuntó cola exposición “Filu/pallabra” de l’artista ovetense Dido Carrero. N’antigua Fábrica d’Ortiz, el público pudo atopar un mercáu aú diferentes empreses amuesaben los sos productos, cuntando col usu l’asturianu como filu conductor. El públicu disfrutó tamién los recitales poéticos, alcuentros con autores, meses reondes, charres y actividaes pa la reciella y los adultos. Arriendes d’ello, nel teatru Prendes proyeutáronse películes asturianes.
Carlos Alba “Cellero”, Alicia Álvarez, Algaire, Nacho Vegas, Acuto Xuegos, Susana Sela, toos tuvieron presentes p’animar esti eventu tan importante. Ensin escaecer la ruta cultural y lliteraria per Candás y los pasacais a cargu del grupu de baille San Félix, qu’apurrieron el calter festivu al Reguerada.
El Reguerada despídese, pero tornará l’añu qu’entra. Poro, marca les feches nel to calendariu. Somórguiati na cultura asturiana, descubri empreses que nun conocíes. ¡Nun pues perdételu!
Susana Sela
This work is licensed under a Creative Commons Attribution 4.0 International License.
