El vienres 20 d’ochobre, en Les Regueres va tener llugar l’alcuentru “Muyeres xenerando riqueza y bientar. Una economía con nome propiu”. El 21, la Feria y Folixa lleva la escuela Juana Millán a Xixón
La Escuela d’Entamadores Juana Millán, financiada pol Institutu de les Muyeres, ye un espaciu principalmente online para la formación y el sofitu a los emprendimientos lideraos por muyeres. Sicasí, los eventos presenciales son una ferramienta fundamental p’averar la Escuela a les muyeres de los territorios concretos.
Nesta ocasión, los díes 20 y 21 d’ochobre, la Escuela Itinerante fai parada n’Asturies, teniendo como oxetivu dinamizar l’ecosistema entamador llideráu por muyeres de la rexón noroeste peninsular (Asturies, Galicia, Cantabria y norte de Castiella y Llión).
Visibilizar y reconocer el llabor de les muyeres pa faer posible un mediu rural vivu, ye un de los
compromisos adquiríos pola Escuela, ye por eso, que’l llugar escoyíu pa empezar esta parada el vienres 20 seya’l conceyu de Les Regueres, con un espaciu pal aprendizaxe, networking y esperiencies inspiradores dirixíu a entamadores y personal técnico.
La primer parte, centrada nel ámbitu económicu, va cuntar cola participación de les consultores gallegues 50pés, que van tratar, ente otres temes, el conocíu como ‘valle de la muerte’, el periodu de tiempu ente qu’un negociu echa a andar hasta que dexa cubrir los gastos que xenera. Pa ello, mientres la mañana del día 20, van dar unes claves p’aidar a les muyeres a transitar esti momentu duru nos emprendimientos, y superar el periodu críticu, alredor del añu y mediu o los dos años, que ye cuando más xente suel abandonar.
La segunda parte de la mañana va tar dedicada a texer redes de sofitu mutuu. Cola ayuda de la sicóloga Alicia F. Sela, de Difusa Sicoloxía, y la pedagoga Cynthia Suárez, va crease un espaciu pal networking onde les asistentes van poder conocese ente elles y los sos proyectos y aldericar sobro la importancia del autocuriáu.
Pa la participación nesti alcuentru ye necesariu inscribise. Les interesaes pueden faelo siguiendo estos dos pasos: primero hai que rexistrase na Escuela y dempués inscribise nel alcuentru.
El sábadu 21 d’ochobre, la Escuela va tar en Xixón celebrando una xornada de festividá na “Vamos de romería. Feria d’Entamadores y Folixa”. De magar les 11 la mañana dica les 20:30 hores, trenta entamadores van esibir los sos productos y servicios.
La música y l’espectáculu en vivu van tar al cargu de les asturianes 6 Riales y Cúntame un Cuadru, amás de la grabación d’un podcast en directu con Alicia F. Sela. La feria, d’accesu llibre, va tener llugar nel Patiu Verde de La Llaboral y va haber un serviciu de ludoteca disponible mientres tola xornada.
Susana Sela
This work is licensed under a Creative Commons Attribution 4.0 International License.
