Los Premios Principiegos tornaron ser un bon escenariu pa reclamar la República Asturiana y l’abondosa lluvia nun torgó la presencia de cientos de manifestantes qu’esperaron na Escandalera pa tornar glayar al rei, a la princesa, a los combayones y los vasallos que nun los aceutamos n’Asturies

“Fuera, fuera”, “Asturies mañana sedrá repúblicana”, “Tolos Borbones son unos fartones/lladrones” o la ya mítica “Asturies nun tien rei” foron delles de les proclames más glayaes al pasu del cortexu real, de los premiaos y los espectadores que diben averándose al Campuamor pa participar nel paripé medieval del vasallaxe y nos ritos de sumisión colonialista. Los xiblíos y abucheos repitieronse ensin descansu, con momentos d’especial tensión cuando los reis (protexios de los manifestantes pola descomanada barrera de seguridá, les decenes de policies y los cientos de gaites traidores) aportaron al teatru.

Yeren les voces de los homes y muyeres d’Asturies que nun asumen xugos nin vasallaxes, y muncho menos xugos foriatos, el Pueblu Asturianu que glaya, que desixe, que costruye coles sos voces otru futuru meyor, más dignu, suyu.

República asturiana versus monarquía española.

Tiempu al tiempu.

This work is licensed under a Creative Commons Attribution 4.0 International License.