Yá ta na cai’l compilatoriu ‘Semando Son’, qu’acomuña dellos nomes mozos de la música n’asturianu, comu Alicia Villanueva & Luis Álvarez Pola, Loína, Algaire y Llevólu’l Sumiciu 

Yá ta disponible’n CD y en toles plataformes musicales Semando Son, el primer compilatoriu de música moza n’asturianu, editáu por Musicasturiana.com, qu’inclúi tres cantares inéditos de caún de los grupos que pudieron sentise na primer edición del Semando Fest nel pasáu mes de febreru, amosando la calidá y diversidá sonora de la música’l país.

Axúntense asina doce temes d’estremaos estilos nos que tolos artistes tienen menos de 35 años. Per un lláu, en tonada recueyen la música d’Alicia Villanueva y Luis Álvarez Pola, per otru alcontramos nesti discu al tríu acústicu de Folk Atlánticu Loína, la música tradicional de la banda Algaire y la fusión de música ellectrónica y asturiana de Llevolu’l Sumiciu.   
L’album, que trata de puxar pol relevu xeneracional promocioando nomes nuevos, grabóse’l pasáu xunetu nos Tutu Estudios de Corvera baxo la producción Sergio Rodríguez y la produción executiva de Xicu Ariza, cuntando col diseñu y maquetación de la ilustradora xixonesa Cecilia Díaz.
Esti discu supón viaxe nel tiempu pela música asturiana, entamando entama per una interpretación de l’asturianada “Al Pasar El Puertu” -que grabó va 100 años La Busdonga– y acaba con sampleos ellectrónicos de vieyos y nuevos cantares de la música asturiana. 

Susana Sela

This work is licensed under a Creative Commons Attribution 4.0 International License.