Con ella son nueve individuos d’estremaes époques, pente ellos cuatro muyeres, que se van topando na  sima de la Cerrosa

En 2018 La Cerrosa, que ta nuna fastera averada a Suárias, féxose famosa pol descubrimientu de delles pieces d’armamentu antiguu.  De magar 2020 excávase añalmente, lo que ta valiendo p’ampliar el conocimientu sobre l’usu ritual de les cueves na Edá del Fierru n’Asturies. 

Na escavación d’esti añu confirmose la presencia d’evidencies ósees d’una muyer que la so mandíbula foi datada pente’l 400 y el 200 a.C. (Segunda Edá del Fierru). Ya van confirmándose, al traviés del ADN, cuatro muyeres d’estremaes époques  cuyos cuerpos, o parte de ellos, foron depositaos a costafecha na sima durante un llarguísimi periodu de tiempu. En total documentáronse nueve individuos fasta la fecha.