Bonos díes, bona xente.

Alborecemos con intervalos nubosos y dellos xarabatos intermitentes ya dispersos con unes temperatures que tan alrodiu de los 11ºC, rexistrándose nel puirtu Payares 0,6ºC.

Güei seguiremos baxo esta ventolera anque pela tarde tenderá amenorgar transitoriamente, nel cielu tendremos intervalos nubosos con xarabatos intermitenes y dispersos, más frecuentes ya intensos na fastera surocidental d’Asturies y llitoral con unes temperatures que camudarán poco o subirán llixeramente , situándose la cota de nieve perriba de los 1300-1500m, subiendo al finar el día a les cumes más altes.

Mañana sábadu la llegada d’una nueva y potente borrasca dende l’Atlánticu norte va reforzar el temporal de vientu y mar, sobre too de cara a la tarde, pela mañana un frente asociado a élla va cruzanos na alborada dexándonos precipitaciones al so paso, amás d’un ascensu bultable de les temperatures durante’l riscar del sábadu, tendiendo a baxar de nuevu pela tarde cuando les raches de vientu puen algamar los 120km/h en zones espuestes de la costa ya en puntos altos de montaña.

El domingu tenderá a meyorar, sobre too col vientu que perderá fuercia pa quedar muncho más seliquino. Nel cielu seguiremos con intervalos nubosos, dalguna precipitación feble ya coles temperatures en descensu, baxando la cota de nieve a última hora perriba de los 1200m.

Que paséis un bon vienres collacies ya collacios.