Esti añu va tar dedicáu al padrimoniu llingüísticu de les naciones ensin estáu 

El conocíu Festival del Arcu Atlánticu va abandonar esti branu les carpes del Muelle pa subir a les places del barriu de Cimavilla. Asina, les places de La Corrada, Arturu Arias, Agustín Xosé Antuña Alonso, La Soledá y les plazueles de Xovellanos y de la cai Salamanca, decoraes con obres d’artistes asturianos especializaos en caligrafía, van ser l’escenariu de les actividaes culturales d’esta edición, con cine na cai, actuaciones musicales y escéniques, visites dramatizaes pol barriu, xuegos infantiles y deportes tradicionales.

L’exe temáticu de la sexta edición del Festival van ser les nomaes llingües minoritaries, esto ye, les llingües propies de les naciones ensin estáu, que son mayoritaries nel territoriu del so país pero non nel del Estáu. Un día va estar dedicáu al occitanu, otru al asturianu con especial atención a la so variante mirandesa, otru al euskera, otru al bretón y otru al gallegu.

El programa, que tovía tien que ser aprobáu pola Fundación Municipal de Cultura, va ser más curtiu que otros años, pasando de diez a seis díes, ente’l 25 y el 30 de xunetu. La inauguración va ser nel Antiguu Institutu con una conferencia sobre ‘Les llingües como padrimoniu cultural europeu’ y el recital poéticu ‘Viaxe peles poesíes del Arcu Atlánticu’.

El Centru de Cultura Antiguu Institutu y la plaza Mayor van ser l’escenariu d’estremaes actuaciones musicales a cargu del gallegu Alann Bique, el grupu portugués Las Çarandas, Les Pandereteres de Eva Tejedor, Anabel Santiago y el tríu Puntada sen Fío. Na plaza Mayor van actuar Felpeyu, la banda de gaites Xácara, Corquiéu, Dixebra, Herbamora, los bretones An Tri Dipop, Xabier Díez y Adufeiras de Salitre y la Banda de Música de XiXón.

Al llau del Puertu Deportivu van instalase’l V Salón d’Agroalimentación y Turismu y va cellebrase l’Arcu Sidreru, con esposiciones fotográfiques, conferencies y degustaciones de diversos tipos de sidre de la Europa atlántica. Nel Campu Valdés va tar el mercáu portugués, con gran protagonismu del conceyu d’Oeiras.

This work is licensed under a Creative Commons Attribution 4.0 International License.