Bonos díes, bona xente.
Alborecemos col cielu nuboso y dalguna precipitación na fastera ocidental, tando menos nuboso na central con unes temperatures mui variopintes por mor del vientu ábrigu, ellí onde tamos al abellugu d’él rondamos los 12ºC y onde non pasen de los 20ºC, rexistrándose nel puirtu Payares 9.8ºC.
Güei vamos tener intervalos nubosos entemecios ente dellos claros o abancios , tando la nubosidá más abondosa na metá ocidental d’Asturies y cordelera onde pue cayer dalguna gotera dispersa y ocasional con unes temperatures altes por mor del vientu ábrigu que pue soplar con fuercia en puntos del llitoral o y zones altes de montaña, siendo sele nel restu.
Mañana martes vamos tener una mañana mui seliquina con grandes claros ya sol, amás les temperatures seguirán siendo suaves, yá pela tarde aumentará la nubosidá de la mano d’un frente que mos dexará precipitaciones d’oeste a este durante la tardiquina con unes temperatures que baxarán dalgo al pasu del mesmu. L’aire sedrá ábrigu pela mañana con raches moderaes na costa y zones altes rolando y amenorgando dempués a componente oeste.
El miércoles seguirá nuboso pero sin malpenes precipitaciones con unes temperatures que camudarán poco y el xueves ya’l restu la selmana paez que volverán a subir pero esto yá lu diremos viendo.
Que paséis un bon llunes collacies ya collacios.
Semeya que mos l’apurre’l nuesu collaciu Paco Cabal.
This work is licensed under a Creative Commons Attribution 4.0 International License.
