Bonos díes, bona xente.

Alborecemos con nubes baxes y dalgo d’orpín na fastera ocidental con unes temperatures que tan alrodiu de los 13ºC, rexistrándose nel puirtu Payares 4,7ºC.

Güei vamos tener nubosidá abondosa de tipu baxu principalmente con precipitaciones febles en forma d’orpín más abondoses y frecuentes na fastera llitoral con unes temperatures másimes en descensu, dándose les mínimes al finar el día. L’aire sedrá de componente noroeste sele en xeneral.

Mañana martes los xarabatos van dir coyendo fuercia y el descensu de les temperatures fadrá que nieve pela cordelera perriba de los 1500m, sobre too na metá oriental, onde la cota de nieve pue tar dalgo más baxa, alrodiu de los 1300m. L’aire sedrá de componente norte con dalguna racha moderada en zones altes ya en puntos del llitoral y l’ambiente sedrá ivernal.

El miércoles los xarabatos van dir remitiendo en frecuencia ya intensidá, les temperatures subirán llixeramente y la cota de nieve tará perriba de los 1800m anque yá sin malpenes precipitaciones, sobre too na fastera ocidental onde’l ,sol va dir ganando terrén a les nubes. L’aire del nordés mos dexará una baxa sensación térmica y l’ambiente seguirá ivernal.

Paez qu’a partir del xueves meyorará nidiamente cola entrada del anticiclón ya tendremos grandes claros nel cielu con xelaes nes zones más favoretibles con probabilidá de qu’esti tiempu estable s’estienda hasta la fin de selmana.

Como novedá a llargu plazu entamen a vese movimientos importantes na atmósfera que podrien traenos el primer temporal gordeu ivernal pero esto yá lu diremos viendo.

Que paséis un bon llunes collacies ya collacios.

Semeya de la braña de les Navariegues en Teberga, semeya que mos l’apurre’l nuesu collaciu Pastorín de Xove.