L’Hotel ARTIEM Asturies consigue esta reconocencia pol cumplimientu de 169 actividaes partíes nos 17 Oxetivos de Desendolcu Caltenible, siendo’l so fuerte apueste polos recursos humanos y enerxéticos, claves pal llogru del certificáu.Con esta yá son 22 les empreses y entidaes certificaes sol estándar Biosphere.
L’Hotel ARTIEM Asturies recibió esti llunes 20 de payares el certificáu Biosphere Sustainable de manos d’Ángela Pumariega Menéndez, primer teniente d’Alcaldía del Conceyu de Xixón, y Daniel Martínez Junquera, director de Visita Xixón, poniendo asina en valor el so enfotu empobináu escontra un modelu de negociu caltenible y un turismu de calidá.
L’hotel de cinco estrelles consigue esta reconocencia pol cumplimientu de 169 actividaes partíes nos 17 ODC (Oxetivos de Desendolcu Caltenible) y el so compromisu social y cultural, al traviés d’acciones como la promoción de la redolada natural, cultural y gastronómicu de Xixón y Asturies. Destaca la so acción social cola comercialización d’una habitación solidaria, a beneficiu de la ONG Cáritas y el so venceyu col esporte gracies la collaboración cola comunidá Cycling Friendly, amás de la so “Wellness Program”, un programa de bientar, con actividaes físiques tantu pa veceros como pa personal del propiu hotel nes sos amplies instalaciones esportives.
Otru de los apartaos reconocíos na entrega ye’l so fuerte apueste polos recursos humanos, con una bona valoración del so plan de formación y profesionalización del personal, lo mesmo que de les ferramientes internes pa la xestión de dichos recursos y les sos campañes de contratación pa dar oportunidaes a persones en riesgu d’esclusión social.
No que cinca a la responsabilidá corporativa, valórase bien positivamente la so orientación escontra la eficiencia enerxética y un consumu responsable de los recursos, al traviés d’oxetivos de meyora definíos nos sos programes, guíes y pautes, tanto na mesma xestión del hotel, como pa los sos provisores, estableciendo aliances con productores de proximidá.
Cola incorporación del Hotel ARTIEM, yá son 22 les empreses y entidaes certificaes sol estándar internacional Biosphere Sustainable, una certificación qu’estrema a empreses y entidaes qu’amuesen nos sos procesos de xestión un altu grau de compromisu col cumplimientu de los 17 ODC, determinaos pola Axenda 2030 de Naciones Xuníes y que’l so oxetivu final ye una mayor responsabilidá na toma de decisiones de tolos axentes del turismu, nos ámbitos ambientales, económicos, culturales y sociales, consiguiendo asina un aumentu de competitividá, calidá y diferenciación.
Susana Sela
This work is licensed under a Creative Commons Attribution 4.0 International License.
