Estes ayudes correspuenden al añu 2.021, yá que nel 2.022 directamente nun se convocó nengún tipu d’ayuda a la vivienda
El conseyeru d’Ordenación de Territoriu, Urbanismu, Vivienda y Derechos Ciudadanos, Ovidio Zapico acaba de prometer qu’el so departamentu va abonar les ayudes al arriendu de 2021 primero que remate l’añu. Estes ayudes tán pensaes por que aquelles persones que nun pueden faer frente a los costos d’una vivienda nun tengan qu’escoyer ente pagar l’arriendu y comer o vivir dignamente. Sicasí, lleguen con dos años de retrasu, dos años nos que munchos tuvieron qu’abandonar esi arriendu y buscase otres formes de vivir, recurriendo a convivir con familiares, habitando infraviviendas o viéndose directamente na cai.
Estos retrásos súmense a la falta de dilixencia de l’Alministración na tramitación d’ayudes y viviendes d’emerxencia, qu’anantes se tramitaben en menos d’un mes y tarden agora ente cuatro y seis meses en ser concedíes, aparte d’otros dos años en ser pagaes.
Los afectaos por esta demoranza son 350 llares, que tampoco van recibir darréu el dineru que se-yos debe, sinón que se va fraccionar en trés pagos.
El conseyeru tamién aseguró qu’el so departamentu trabaya yá nel resolvimientu de les ayudes correspondientes al añu 2023, yá que en 2022 nun hubo convocatoria de subvenciones por esti conceutu, pesi a que’l 15% de los asturianos viven n’infraviviendes.
Relacionao:
Los retrasos na concesión d’ayudes a la vivienda causen desfiucios
Los menores de 30 años tendríen que dedicar más del 56% del so sueldu a vivienda pa independizase
This work is licensed under a Creative Commons Attribution 4.0 International License.
