A falta d’un mes pa finar l’añu, la pancarta na que Stop Violencies recueye’l númberu d’asesinaes por ser muyeres avérase con velocidá al cien, con siete asesinatos nel caberu mes
Pesi a la fuerte lluvia, media centena de persones aconceyaron ayeri al pie de La Gota Llechi, en Xixón, pa denunciar comu ca miércoles final de mes la violencia machista y remembrar a les muertes no que va d’añu, una cifra apavoriante -97- que supera el total de muertes por añu de la cabera década; y l’añu entá nun finó. Namás nel caberu mes foron siete les víctimes: Carolina, 39 años, de Getafe, Madrid, Tatiana Beatriz Ascoy Torres, 25 años, de Madrid, Leticia, 37 años de Madrid, Nina, 5 años, Madrid, Belén Sánchez Moreno, 45 años, Toledo, Judith, 37 años. Pontevedra y una mujer de identidad no conocida, de 30 años, en Málaga.
Cerca cien víctimes, d’ente tres meses a 91 años, percorriendo tola xeografía estatal -dos d’elles, n’Asturies- d’estremaos oríxenes y clases sociales.
La violencia contra les muyeres, en xeneral, y la que les lleva a la muerte, en particular, algama a tola sociedá y ye tola sociedá quien tien de llantase y dar fin a esta llácara.
Sicasí, comu destacó Carme Pérez, d’Andecha Astur, a quien correspondió esti mes lleer el manifiestu, les xorrecientes cifres amuesen a les clares que’l sistema nun furrula.
“Agora mesmo, la violencia machista ye un problema social de seguridá de primer orde. N’Asturies, por centramos no cercano, según datos de la propia policía espublizaos estos díes, los delitos de violencia machista suponen casi la mitá de les detenciones nel pasáu exerciciu y les órdenes
d’alloñamientu duplicáronse” apuntó Carme, quien insistió na inutilidá de les midies tomaes fasta agora pa solucionar el problema “Hai que dexase de demagoxa. Nun val de ná reunise en “gabinetes de crisis” ca vegada que s’acumulen les muyeres asesisnaes enriba la mesa. Esti problema social que denunciamos güei equí tien qu’abordase d’una vegada a fondu, en serio y dende distintos frentes: el xudicial, l’educativu, l’económicu…. Si non, seguiremos teniendo motivos pa reunimos equí tolos meses” vaticinó.
Al finar l’actu lleéronse los nomes de les víctimes. Fueron necesaries siete persones y siete minutos pa lleer la llista completa.
Nel Dos Santos
This work is licensed under a Creative Commons Attribution 4.0 International License.
