La campaña, que pidi Xusticia Social y denuncia la fuerte perda de capacidá adquisitiva de los asturianos nos caberos años, entamó con otra aición asemeyada en Xixón
“Dexar de comer pa poder comer” y “Cola carestía, una comida al día” son los llemes que se lleíen nes pancartes desplegaes el pasáu vienres delantre la Ca’l Conceyu d’Avilés, onde pente les lluces navidiegues se denunció otra vuelta les dificultaes que tienen la mayoría de los y les asturianes a la de llevar una vida digno. La precariedá llaboral, sumao a la inflación xabaz lleven al Pueblu Asturianu a una situación incaltenible, ante la que dende la plataforma Asturies Insumisu reclamen una urxente aición per parte’l gobiernu d’Asturies, qu’incluya l’aplicación de la Llei del Comerciu Minorista, interviniendo los precios de los bienes básicos de consumu, incluyendo poner topes a los precios de la vivienda.
L’oxetivu ye garantizar l’acesu a una alimentación de calidá y a un llugar onde vivir, cuestiones básiques que nun deberíen esmolecer a denguna persona.
Demientres l’actu, que tuvo acompangáu de música de gaita, repartiéronse pente los presentes cientos folletos onde se desplica la campaña y les sos vindicaciones, que foron perbien acoyíes polos avilesinos.
Nel Dos Santos
This work is licensed under a Creative Commons Attribution 4.0 International License.
