La Casa de los Alberti, en Ciañu, acueye del dos al trenta y ún de xineru la esposición “Roxos”, de Rafael Pérez Lorenzo
Seique podría ser una esposición sobre la hestoria comunista y revolucionaria d’Asturies, nesta ocasión “Roxos” fae referencia a un collor, l’encarnáu. Carmín, bermeyón, púrpura, tierra, cadmiu, escarlata, cobre, granate… son matices d’un tonu enerxéticu que causa efectos especiales nel organismu: aumenta l’actividá hormonal, aguiya’l mambís, alza la temperatura y acelera el ritmu cardiacu. Nel llinguaxe, como al traviés d’un prisma, el so significáu refráctase nun espectru de vivos contrastes; una polisemia tan dual como’l rayu irisáu nel que viaxa: el roxo da vida al fierro y col tiempu desfaelu; en dos marques inclinaes revela peligru, pero cruciaes, conduz al rescate; nel aire alienda osíxenu, pero afuega les marees. Afayase nel orixe del cielu y nel so final. Con forma d’estrella dibúxase una constelación d’esperances, pero traza otra de decepciones. Dempués de too, ye’l calor de la quema, pero tamién del bomberu; y, nos nuesos cuerpos, empreslla una mecha de conflictu: nel so interior ye puxanza y, fora, muerte. Inspira pasión y tamién calma; ye signu de valor y de rabia; pa la fe, espresa un ciclu innomable ¡Y pa un doceavu de la metá de los güeyos ye verde! Esti ye un color de lluches ente lo aparente y lo invisible. Nél empieza la lluz. Y perbaxo namás esiste escuridá.
Con esa intensidá recueye los matices de lo collorao Rafael Pérez Lorenzo, fasta va seyes años Profesor y Decanu de la Facultá de Comerciu, Turismu y Ciencies Sociales de la Universidá d’Uviéu que de magar la so xubilación dedicóse a afondar nel llinguaxe fotográficu, con semeyes n’esposiciones individuales y colectives. Nel mundu del teatru a realizáu numberoses imaxes promocionales pa Teatru del Norte, Etelvino Vázquez, pa obres de diversos autores. Nos 80 tamién realizó semeyes de moda que s’espublizaron en folletos y en revistes asturianes.
Gracies a l’Asociación Asemeyando, de magar el dos de xineru pue esfrutase d’esta cabera coleción suya en La Casa de los Alberti, en Ciañu.
This work is licensed under a Creative Commons Attribution 4.0 International License.
