La organización nacionaliega xune la so voz a les munches voces qu’en redes sociales denunciaron l’apaición del monarca nes pantalles de los que teníen prendía la TPA y destaca que de nun emitise na TPA Asturies tendría la menor cifra de siguimientu del discursu del rei

Andecha Astur considera improcedente que se quiera meter a calzaor nos llares d’Asturies un discursu ayenu dafechu a la realidá asturiana y que, comu los datos demuestren, interesa ca vegada menos a una población que nun s’identifica cola monarquía obsoleta, corrupta y española que representa Felipe IV. Poro, solicita a la TPA que dexe d’emitir estos discursos nos años venideros.

Los datos d’audiencia rexistraos n’Asturies demientres la emisión del mensaxe del rei d’España indiquen qu’un 54% de les televisiones asturianes tuvieron prendies nesi intre nun de los canales que lu emitieron, bien perbaxo la media estatal pero perriba de lo que se vio en Catalunya, col 42,3% ya Euskadi, col 46,7%. Estos datos nun recueyen, comu apunta un usuariu de X/Twitter, un puntu importante “silenciáu, pero que nun dexa de conllevar un aparataxe que tendría de ser estudiao”: nin Catalunya ni Euskadi emitieron el discursu del Rey pelos sos canales autonómicos ETB ni TV3, mentantu que la TPA asturiana si que lu emitió. “Atrévome a asegurar que’l seguimientu en nuesu pequeñu país norteñu sedría incluso menor que’l d’Euskadi si nun s’emitiere na TPA, que llevó un share durante esi discursu (persones que dexaron la tele prendía, al mio entender) d’un 14%”.

Acordies estos datos, de nun emitise na TPA, el discursu’l rei sedría televisáu nun 40% de los llares asturianos, cuasi la metá de los que lu vieron nes castielles y la cifra más baxa de tol Estáu. 

Nel Dos Santos

This work is licensed under a Creative Commons Attribution 4.0 International License.