Bonos díes, bona xente.
Alborecemos con escasa nubosidá na mayor parte d’Asturies, sicasí nel llitoral hai dalgo de nubosidá estratificada con unes tempertures que tan alrodiu de los 7ºC, rexistrándose nel puirtu Payares 1,3ºC.
Güei vamos tener el cielu poco nuboso en xeneral con unes temperatures másimes que camudarán poco, baxando les mínimes que van dase al finar el día cuando entamará a xelar en munches zones del interior asturianu. L’aire sedrá sele ya variable con dalguna brisa pela costa.
Mañana domingu vamos tener un día perguapu, soleyeru, fríu a la solombra pero afayaizu al sol col cielu escampláu, sicasí na primera llinea de costa pue surdir dalgo de nubosidá estratificada, amás l’aire seguirá siendo sele ya variable. N’alborada alboreceremos con xelaes xeneralizaes nel interior Astur.
El día de Navidá vamos seguir baxo la influencia del anticiclón anque ye probable que tengamos dalgo más nubosidá estratificada nel llitoral y fastera central asturiana a partir de la tarde. Pela mañana alboreceremos con escasa nubosidá y xelando no fonderu los valles. L’aire seguirá mui seliquín y les temperatures van camudar poco.
Hasta’l miércoles tendremos un tiempu mui asemeyáu con dalguna nube baxa nel llitoral y fastera central asturiana pero con predominiu de los grandes claros o abancios y cielu más escampláu nel interior y cordelera onde seguirá xelando nes zones favoretibles.
A partir del xueves aumentará la nubosidá y subirán les temperatures mínimes cola posibilidá de dalguna precipitación feble ya dispersa y yá de cara al sábadu una vaguada atlántica con fríu n’altor barrerá Asturies, dexándo precipitaciones, un descensu bultable de les temperatures y nevaes moderaes pela cordelera que puen surdir perriba de los 800-1000m. pero esta situación va ser transitoria, malpenes durará 24-48h.
Sabemos qu’hai xente con munches ganes d’iviernu y sobre too de nieve nes montañes y de momentu poco hai onde rascar anque paez qu’entamen a vese camudos importantes n’estratosfera que puen transferirse a capes más baxes y camudar la circulación atmosférica actual, pa dexanos un mes de xineru mui entreteníu meteorolóxicamente falando. Vamos a ver si sacamos dalgo especial falando de too esto los prósimos díes, tar sollertes.
Que paséis un bon sábadu collacies ya collacios.
Semeya del Pastorín de Xove del cumal Miruellu.
This work is licensed under a Creative Commons Attribution 4.0 International License.
