Bonos díes, bona xente.
Alborecemos col cielu cubiertu y xarabatos intermitentes con unes temperatures que tan alrodiu de los 7ºC, rexistrándose nel puritu Payares -1,2ºC onde ta nevando.
Güei los xarabatos de l’alborada van dir perdiendo fuercia ya frecuencia durante la mañana, abriéndose dellos claros o abancios pela tarde cuando remitirán les precipitaciones quedando escampláu al finar el día, dándose les temperatures mínimes ya entamando a xelar nes zones favoretibles. La nieve surdirá perriba de los 1000-1200m y l’aire de componente noroeste amenorgará pa quedar sele ya variable.
Mañana domingu alboreceremos col cielu escampláu y xelando nel interior asturianu anque rápidamente dirán llegando nubes altes de la mano d’una nueva perturbación que mos afeutará’l llunes, así y too nun se descarten delles precipitaciones febles pela tarde, sobre too na metá ocidental d’Asturies con dalguna nevada feble pela cordelera perriba de los 1400-1600m en cara sur. L’aire va dir coyendo fuercia y al escurecer sedrá ábrigu con raches moderaes en zones de montaña. Les temperatures mínimes en descensu bultable, mentantu que les másimes subirán dalgo, dándose estes a última hora del día.
El llunes vamos tener precipitaciones de nuevu ya un descensu de les temperatures a partir del mediudía que fadrá baxar la cota de nieve de los 1500m, anicialmente, a los 1000m al finar el día, l’aire de componente noroeste pue soplar con raches moderaes en zones de montaña ya en puntos del llitoral.
El martes tendremos nubes ya claros o abancios con tendencia a escampláu y xelar ya’l miercoles alboreceremos col cielu escampláu pero rápidamente van dir entrando nubes que tapecerán el día pero esto yá lu diremos viendo.
Que paséis un bon sábadu collacies ya collacios.
Semeya de Mary Pandiella.
This work is licensed under a Creative Commons Attribution 4.0 International License.
