Bonos díes, bona xente.

Alborecemos con nubes ya claros o abancios, tando más nuboso na metá ocidental y cordelera, amás sopla con fuercia l’aire con unes temperatures que tan alrodiu de los 12ºC, rexistrándose nel puirtu Payares 2,5ºC.

Güei vamos tener intervalos nubosos con xarabatos a partir del mediudía cuando l’aire tenderá a rolar a componente oeste-noroeste, amás les temperatures descenderán asina como la cota de nieve que baxará de los 1500m aniciales a los 1000m pela tarde. L’aire gallegu seguirá soplando con muncha fuercia, sobre too en zones altes de montaña ya en puntos del llitoral.

Mañana martes seguiremos col ambiente nuboso y ambiente fríu con un descensu nes temperatures mínimes y másimes pudiendo xelar nes zones más favoretibles y de montaña. L’aire amenorgará pa quedar sele ya variable.

El miércoles sedrá’l meyor día de la selmana con dalgo de nubosidá alta que mos caltendrá un ambiente fríu pero selequín con una lluz ivernal y xelaes n’alborada, onde podremos esfrutar del mantu blancu de la cordelera y el so silenciu porque malpenes va soplar l’aire.

El xueves un frente altlánticu barrerá la península Ibérica que malpenes mos va afeutar al tar abellugaos pela cordelera y el vienres dempués de la subida de les temperatures del xueves por mor del vientu ábrigu volverán a baxar dalgo ya tendremos dellos xarabatos febles ya disperses que sedrán de nieve perriba de los 1500m.

De cara al sábadu ya domingu los vientos atlánticos mos apurrirán una subida bultable de les temperatures con nubes medies ya altes y dalguna precipitación na fastera más surocidental d’Asturies.

Que paséis un bon llunes collacies ya collacios.

This work is licensed under a Creative Commons Attribution 4.0 International License.