La votación popular al traviés de les redes pa escoyer la pallabra que s’incluyirá esti añu nel Diccionariu de la Llingua Asturiana dio como favorita “xentrificación”, con un 33% de los votos

Nos últimos díes d’avientu, l’Academia de la Llingua Asturiana (ALLA) convocara una votación pa escoyer el neoloxismu del añu 2023, col compromisu d’incorporalu al Diccionariu de l’Academia de la Llingua Asturiana (DALLA).

El términu «xentrificación» ye un anglicismu (gentrification), obra de Ruth Glass, socióloga que va mediu sieglu yá describía’l procesu de tresformación social y urbana determináu pola sostitución de les clases trabayadores por otres de la nobleza baxa o terrateniente, la «gentry». L’ALLA ufre, precisamente, como amuesa del usu d’esta pallabra un fragmentu del llibru de l’autora “London: Aspects of Change”, del añu 1964: “Ún per ún, munchos de los barrios de clas trabayadora ta invadiéndolos la clas media, mesmo alta que baxa. N’emprimando esti procesu de «xentrificación» nun distritu, entaína hasta desapolinar a la mayoría o a tolos habitantes de clas trabayadora, camudando dafechu’l calter social del distritu”.

Dexando a un llau la validez científica del métodu pa envalorar la incorporación de pallabres al idioma, la escoyeta d’esti términu, col 33% de los votos, perriba d’otros comu “cambéu climáticu” col 26%, “intelixencia artificial” con 24%, xeolocalización, col 12% o “llimpieza étnica”, con namás un 5%, nun ye casual, sinón que vien dada pola vixencia que’l términu tien na sociedá asturiana.

Les propuestes, toes cinco, formaben parte del material de trabayu que la comisión llexicográfica de l’ALLA tresna, estudia y valida periódicamente pa l’actualización del DALLA, principal fonte normativa de tipu léxicu de la llingua asturiana: diccionariu.alladixital.org.

Susana Sela

This work is licensed under a Creative Commons Attribution 4.0 International License.