La falta d’información y tresparencia sobro’l furrulamientu de la recoyida del Puntu Llimpiu Móvil n’Illás lleva al espoxigue de basorieros pirates

Los vecinos d’Illas tienen namás un día al mes pa llevar al Puntu Llimpiu Móvil, que se desplaza esi únicu día hasta la capital del conceyu, pa desfacese de muebles, enseres y demás residuos de gran tamañu. El problema ta, comu vienen denunciando los propios vecinos dende xineru del añu pasáu, que nun hai manera de saber que día ye esi, ya que la información que sigui apaeciendo na páxina web del Ayuntamientu ye la correspondiente al añu 2022.

Ello asina, los residentes de la fastera nun tienen forma de saber cuando pueden o non desfacese de la basoria, lo que ta derivando nel espoxigue de dellos basorieros pirates nel conceyu, comu’l qu’hebio de desaniciase a finales d’avientu l’añu pasáu por parte del personal municipal na redolada La Llaguna, depués de ser reiteradamente denunciáu por un vecín.

La situación ye sobradamente conocía por parte l’equipu de gobiernu del conceyu, puesto que van recibiendo reiteraes denuncies, la cabera, esti mesmu mes, reclamando la trasparencia y l’actualización de los datos. 

Alberto Rodríguez

This work is licensed under a Creative Commons Attribution 4.0 International License.