A estos cuasi 9.000 moraores menos hai que sumar los miles d’asturianos -mocedá formada principalmente- qu’abandonen añalmente’l país a la gueta de meyores condiciones de vida

Asturies rexistró 4.190 nacencies dica payares de 2023, frente a los 4.744 del 2022, lo qu’implica un 3,04 per cientu menos que nel mesmu periodu del añu anterior. Echando la vista atrás les diferencies son entá mayores: nel añu pasáu nacieron pocu más de la metá que nel 2008, cuando yá se falaba de falta de natalidá ya inclusive de “xenocidiu anunciáu”. L’añu más fecundu de la serie histórica desque se recueyen datos foi’l 1958, cuando nacieron 19.913 asturianos; coles cifres actuales seríen necesarios cinco años para llegar a esa cantidá.

Como datu a destacar, el xorrecimientu de les nacencies de mas mayores de 40 años indica que la falta  natalidá, más que al refugu de formar una familia, débese a que les asturianes retrasen tolo que pueden el momentu de tener descendencia, cola esperanza de llegar a consiguir un nivel de vida afayaizu.

Esti continuu descensu de la natalidá vien acompangáu d’una mortandá daqué menor que nos años de pandemia, pero igualmente bien alta: 12.951 muertes nel mesmu tiempu que los 4.190 nacencies, el triple de fallecimientos que de partos.

Tou ello paez indicar que les polítiques del “Retu Demográficu” nun tán dando precisamente resultaos y van siguir ensin dalos mientres nun s’implementen polítiques llaborales y de vivienda que permitan la emancipación, frenen l’ésodu de mocedá asturiana ya inclusive atraigan de vuelta a emigraos. 

Alberto Rodríguez

This work is licensed under a Creative Commons Attribution 4.0 International License.