Siguiendo’l so vezu de facer política -cuasi esclusivamente- al traviés de les redes sociales, Adrián Barbón tuiteó una controvertía felicitación de magar les declaraciones d’Ernest Urtsasun
El Ministru de Cultura Español declaró“ye urxente protexer dos llingües minorizaes como l’aragonés y l’asturianu” a lo que Barbón retruca en redes que “Su apuesta por reconocer el asturiano, a pesar del bloqueo del PP-VOX en Asturias para impedir reconocer la oficialidad en nuestro Estatuto es algo que, como Presidente, tengo que valorar muy positivamente”, tuit obviamente escritu n’español y namás que n’español.
Siguiendo el so mesmu camín, los ciudadanos encargáronse ya nes redes de recorda-y que precisamente la falta d’Oficialidá del asturianu vien d’un Estatutu impuestu a los asturianos non por PP-VOX, sinón pol so propiu partíu, qu’el PSOE nun oficializó l’asturianu en tol tiempu que tuvo mayoría pa facelo y qu’elli mesmu, tres de ganar les elleiciones xugando la baza la oficialidá, nun dio nin un solu pasu a favor d’ella.
Incluso escaeciéndose de la oficialidá, la hestórica represión del asturianu por parte’l PSOE continúa baxo’l propiu mandatu d’Adrián Barbón, con cara más amable, eso si, pero represora en tou casu.
Foi baxo’l so mandu que se suspendió la esitosa esperiencia d’utilizacion del asturianu comu llingua vehicular en 6 colexos, ye elli quien continúa torgando a los profesores d’asturianu la especialidá docente ya’l porcentaxe d’emisión n’asturianu na TPA ronda mui escasamente’l 15% de la programación, incluso considerando asturianu los programes disglósicos nos que la llingua ye mal falada en tonu de comedia folclorista. El gobiernu d’Asturies, en xeneral, y Adrián en particular non solo nun utilicen l’asturianu, sinón que nun respeten siquier la toponimia oficial.
Asina les coses, cabe entrugase a qué collaboración se refier el presidente cuando “ufre la collaboración del so Gobiernu al Ministru de Cultura”.
Nel Dos Santos
This work is licensed under a Creative Commons Attribution 4.0 International License.
