El programa del Cursu de Funcionariáu en Práctiques pa docentes, entamáu pola Conseyería d’Educación y qu’entama güei nun fae mención dala a la coeducación pente los conteníos a tratar nes siete sesiones de les que costa

Dende’l Sindicatu d’Ensiñantes SUATEA remembren que la nueva Llei d’Educación 3/2020 -LOMLOE- tien nos sos principios rectores la igualdá ente muyeres y homes, reforciando esti enfoque al traviés de la coeducación ya impulsando la igualdá efeutiva en toles etapes educatives. Los centros deberán incluyir y xustificar nel so proyectu educativu les medíes que desendolquen pa formar n’igualdá en toles etapes educatives, incluyendo la educación pa la eliminación de la violencia de xéneru, el respetu poles identidades, cultures, sesualidaes y la so diversidá, y la participación pa facer realidá la igualdá. 

Esisten, amás, otres dos Lleis Orgániques d’obligáu cumplimientu que directamente se rellacionen cola educación n’igualdá: Llei Orgánica 1/2004, de 28 d’avientu, de Midíes de Protección Integral contra la Violencia de Xéneru y Llei Orgánica 3/2007, de 22 de marzu, para la igualdá efectiva de muyeres y homes.El mesmu Plan de Coeducación del Principáu d’Asturies, mentáu nel Decretu 30/2023, de 28 d’abril pol que se regula la Coeducación nel sistema educativu asturianu, contempla acciones de formación y materiales en materia d’igualdá, tantu del personal docente como del personal non docente.
Poro, dende SUATEA consideren inadmitible que la Conseyería d’Educación nun ufierte formación dalguna en coeducación al profesoráu qu’acaba de superar un procesu selectivu nel que’l marcu llegal indica, per primer vegada y de manera clara, que la igualdá ente muyeres y homes ye un principiu qu’hai de rexir tola acción educativa.

Susana Sela

This work is licensed under a Creative Commons Attribution 4.0 International License.