Esta investigación súmase a otra de prevaricación por parte l’alcalde ya’l secretariu que ya ta estudiando la Fiscalía Superior
Cola presentada a día de güei son 86 les denuncies que l’afectáu va presentando pente agostu del 2022 y xineru del 2024, ensin que se tomaren midies al respeutu, contra la dueña del comerciu La Parra (Martina Capín Camino), contigúu a la so casa, por acosu, insultos, menacies, agresiones, ruidos y usurpación de terrenos.
La denunciada resulta tener vínculos d’amistá col alcalde y ser hermana de Daniel Capín Camino, conceyal electu y dambos actuen, según el denunciante, en connivencia cola Xefa de Serviciu del de Xestión y Calidá comercial de la Conseyería de Transición ecolóxica, Industria y Desendolcu económicu, María Belén Alonso Pérez.
La Fiscalía determinará nos prósimos meses si esta cabera pudiera ser suxetu activu d’un supuestu delitu de prevaricación, desdexación de funciones, tráficu d’influencies, odiu y discriminación, colos agravantes de alevosía, prevalencia de cargu públicu y reincidencia, por torgar, a sabiendes, l’exerciciu de derechos cívicos; y, per otra parte, valorará si tantu Fernando Alberto Tirador Martínez como Juan Manuel Acebal González, Alcalde y Secretariu del Conceyu d’Illas, yá investigaos per parte de la Fiscalía Territorial d’Avilés, pudieren ser suxetos activos d’un supuestu delitu de prevaricación desdexación de funciones, tapecimientu de documentos, de coecho, de tráficu d’influencies, d’odiu, por discriminación y colos agravantes de alevosía, prevalencia de cargu públicu y reincidencia y por torgar, a sabiendes, l’exerciciu de derechos cívicos reconocíos pola Constitución.
Les denuncies por incumplimientu d’horarios foron tramitaes nel rexistru d’Illas con destín al Serviciu de Xestión y calidá Comercial. Apuntar qu’esti Serviciu ye l’encargáu de sancionar los incumplimientos d’horariu ya’l conceyu l’encargáu de que se cumplan.
La primer rempuesta a les primeres d’eses denuncies aportó cuasi un añu depués de la primera, cuando diben ya 18 cursaes y namás por requerimientu espresu de rempuesta por parte’l denunciante. El citáu comerciu nun tenía per aquel entós espuestu, comu ye preceutivo, el so horariu comercial, incumplimientu sancionable ya de por si. Nesa rempuesta apúntase a que naide verificó fasta l’intre in situ los incumplimientos denunciaos, situación que se repite na cabera rempuesta recibida recientemente, otru añu depués.
A tolos incumplimiento de ruios y horarios súmase’l resultáu de la inspección de Sanidá que careció’l comerciu en marzu l’añu pasáu, de la que se desprende que nun cumplen los requisitos mínimos pa ufrir el serviciu de bar y comides que realicen, faltando además elementos de seguridá claves, comu estintores.
Ante la reticencia de la Xefa del serviciu, María Belén Alonso Pérez, a considerar les denuncies, coles correspondientes prebes gráfiques, incluyendo semeyes nes que se ven veceros y les lluces del establecimientu prendies fuera l’horariu de preslle, la continua contradicción nes lleis a aplicar y nos datos apurrios na desestimación del casu ya incluso la invisibilización documental de delles de les denuncies interpuestes -considerando la quinta comu la primera- el denunciante decide recurrir a Fiscalía pa la defensa los sos drechos.
Amás, nel tonu la cabera carta unviada por María Belén Alonso Pérez el alviértese ciertu tonu de menacia. Nella, tres afirmar que nes semeyes y documentos aportaos nes denuncies, “constatase qu’hai persones nel porche o terraza d’entrada al establecimientu falando o consumiendo bebides”, apunta a que nun investigará el casu dende’l so serviciu ya que “…esta intervención, como consecuencia de les sucesives denuncias formulaes por un particular, nuna especie de monitorización diaria de l’actividá d’un establecimientu comercial concretu, supondría una situación d’abusu de posición por parte de l’Alministración o mostraría una actitud por parte del denunciante d’importunar a un terceru.” Ello ye, tovía’l denunciante tendría la culpa de la falta de xixilancia y actuación de l’alministración, menaciándose-y por denunciar, en pallabres del escritu presentáu en Fiscalía “la negligencia cosciente de la propietaria del negociu cola connivencia de la permisividá d’unos funcionarios que, a sabiendes y con pruebes, permiten y consienten la illegalidá durante más de dos años, polo cual termino teniendo qu’asistir a los Servicios de Salú Mental pa intentar poder conciliar el descansu”.
Nel Dos Santos
This work is licensed under a Creative Commons Attribution 4.0 International License.
