Marcha Sotiellos/Campumanes en denuncia de les consecuencies de les obres del A.V.E ya en defensa del tren públicu caltenible
Les Asociaciones de Vecinos de Campumanes y la Caleya, la plataforma ciudadana El Mesqueiru, xunto a integrantes de dellos grupos ecoloxistes asturianos, la plataforma pola defensa’l parque Les Ubiñes, Escanda y coleutivos de sofitu dende Lleón, participaron nesta concentración de denuncia pol despropósitu de les obres ferroviaries, una estafa de trece años que ta causando serios perxuicios a ambes vertientes de la Cordelera Cantábrica.
Fontes y regatos secos por desecación y desvíu d’acuíferos, vertíos tósicos, chatarra enterrao, argayos, istalaciones ensin llicencia, detonaciones nocherniegues… un cúmulu de chapuces que los vecinos de la fastera tienen que soportar en nome del “tresporte y la comunicación” con España, tou ello a sabiendes de que “nun tuvo que ver con la meyora de les comunicaciones, sinón que se trataba d’un negociu basáu nel caltenimientu de la obra” ya que, paradóxicamente, los vecinos vense privaos d’un serviciu ferroviariu “públicu de calidá, caltenible y acesible”
Les megaobres del AVE lleven trece años d’imprevistos y desastres que van prevocando, fasta agora, un incrementu de cerca de 3.000 millones d’euros sobre’l presupuestu anicial pa 50 km, ensin que se vea prósimu’l fin de les obres.
Por tou ello, los aconceyaos reclamaron “Responsabilidaes, reparaciones y compensaciones polos daños causaos poles interminables y desastroses obres de la variante’l Payares”.
This work is licensed under a Creative Commons Attribution 4.0 International License.
