Fidalgo (PSOE) pide “normalizar” l’usu del asturianu na comunicación institucional del Conceyu d’Uviéu. Maxinamos que desconoz que’l so partíu lleva décades gobernando Asturies y que nun hai na tan normalizador comu reconocer la oficialidá del asturianu dende la Xunta Xeneral
La escuela de brindis al sol que llidera Adrián Barbón da los sos frutos. La conceyala del Grupu Municipal Socialista nel Conceyu d’Uviéu, Sonia Fidalgo, pidió esti llunes la normalización del usu institucional del asturianu.
Sicasí, nin nes comunicaciones internes nin esternes del so partíu s’utiliza, nin n’Uviéu nin n’otru conceyu esta llingua, cuestión pa la que nun precisen pidir permisu a dengún otru partíu. Tampocu esisten normatives de normalización y usu del asturianu en dengún de los conceyos que por décades gobierna’l PSOE, partíu que foi hestóricamente punta de llanza de la represión llingüística y qu’agora ve’l reditu elleutoral de prometer una oficialidá qu’enxamás nun pensó dar.
Les midies concretes que propón Fidalgo pa esa normalización incluin cuestiones tan “atrevíes” comu utilizar la toponimia oficial -lo contrario va contra llei-, recuperar el nome de folixes comu l’antroxu o l’usu del asturianu nel mediu favoritu del gobiernu barbonista: les redes sociales. Lo de garantizar l’atención mélica, educativa y alministrativa n’asturianu, utilizalu comu llingua vehicular en plenos y comunicaciones oficiales, asegurar la defensa en casos de discriminación llingüística o desixir el so conocimientu a los funcionarios del conceyu déxalo pa prau.
Nel Dos Santos
This work is licensed under a Creative Commons Attribution 4.0 International License.
