Fasta esta edición la presencia del asturianu taba perfechamente integrada y presente nel festival, polo qu’hai quien ve na so ausencia daqué de cumplimientu de les menacies de la conceyala de VOX d’arrequexar tolo que toviere n’asturianu nel ámbetu cultural
El programa del festival de poesía entamáu pol Conceyu de Xixón, el POEX, que siempres incorporaba dellos espacios pa la poesía asturiana y la música espresada nesti idioma, nun tien esti añu nengún actu que-y dea protagonismu a la lliteratura fecha n’asturianu, invisibilizando dafechu esti idioma.
Iniciativa pol Asturianu ya denunció esta censura al asturianu nun espaciu nel que yera hasta agora más que natural la so presencia, yá non solo por ser un actu cultural que se celebra en Xixón, sinón porque “la poesía fecha n’asturianu tien gran puxu non namás n’Asturies, sinón tamién fuera de les nueses llendes, onde n’eventos lliterarios ye habitual la presencia d’autores n’asturianu”. Pa Iniciativa ye inesplicable que se tea sacando al asturianu d’actos culturales como esti y entrúgase si esto nun tien que ver coles polítiques anunciaes por miembros del gobiernu de Xixón d’evitar actuaciones artístiques en llingua asturiana.
Ye importante recordar que la Ordenanza Municipal del Usu de la Llingua Asturiana nel ámbitu del Conceyu de Xixón, vixente y aprobada por unanimidá nel añu 2008, diz nel so artículu 8 que l’Ayuntamientu “va fomentar y promocionar l’usu del asturianu en tolos ámbitos de la vida social y nes diverses actividaes culturales, deportives, mercantiles y cualesquier otres”, colo que la programación del POEX 2024 contravién de forma clara’l propiu ordenamientu xurídicu del Conceyu de Xixón. Dende Iniciativa desixen “un cambiu nesta programación que-y dea espaciu a la lliteratura asturiana col altor que merez”.
Alberto Rodríguez
This work is licensed under a Creative Commons Attribution 4.0 International License.
