De les places 5’7 places esistentes por ca 100 persones mayores de 65 años, namás 3’6% son públiques entanto qu’otru 2’1% pertenecen a residencies privaes
Más de la cuarta parte de la población asturiana tien más de 65 años, casi cinco mil d’ellos sobrepasando el sieglu de vida. Les décades d’emigración a la gueta de trabayu y les condiciones económiques actuales, qu’impiden na mayoría de la familia salir alantre si nun trabayen tolos miembros n’edá de facelo, dificulten abondo l’atención a la xente mayor, munchos d’ellos residentes a miles de km de los sos descendientes. En permunchos casos, la única solución ye conseguir plaza nuna residencia, aún con toles dudes xeneraes sobro la so idoneidá depués de la crisis del COVID.
Tampoco toles families pueden permitise’l coste d’esti serviciu: los precios d’estes places superen, na so modalidá más económica, los dos mil euros de media en residencies privaes y nel casu de les concertaes con fondos públicos oscilen dende los 1.500 € casu de nun haber denguna dependencia fasta los 2.217 € pa dependientes de gráu III.
Sicasí, nun hai places abondes. A finales del 2023 había más de 2.800 persones en llista d’espera pa entrar nun d’estos centros, más otres 380 esperando poder acceder a un centru de curiáu de día. El resultáu son miles d’asturianos qu’a la fin de la so vida alcuéntrense solos ya ensin poder acceder a un serviciu d’atención que cubra les sos necesidaes.
Llucía F. Marqués
This work is licensed under a Creative Commons Attribution 4.0 International License.
