La Primer Sidre L’Añu pendiente de Carmen Moriyón

28 Febreru, 2024

L’allugamientu nel Muséu del Pueblu d’Asturies depende d’ún resolvimientu de l’alcaldía de Xixón, pero la Primer Sidre l’Añu, eventu declaráu d’Interés Social pol Conceyu Xixón, cellebraráse, nel Pueblu d’Asturies o n’otru llugar, pente’l 28 ya’l 31 de marzu

La Primer Sidre L’Añu, un eventu que cellebra a lo grande l’apertura de los toneles cola sidre nuevo nuna macroespicha multitudinaria, lleva 14 temporaes inagurando oficialmente el calendariu de festividaes sidreres del añu. Dende’l primer momentu vien tando mui estrechamente lligada al llugar onde se cellebró siempres, el Muséu del Pueblu d’Asturies, nuna perbona simbiosis que da vida al Muséu, al tiempu qu’esti acueye a los participantes con unes instalaciones bien afeches al eventu.

Sicasí, esti añu la direición del Muséu del Puebrlu d’Asturies emitió un informe negativu, en base a una llei de 2015. La Fundación Asturies XXI, organizadora del eventu, manifestó la so estrañeza ante esti cambiu de postura, ya que fasta esti añu nun supunxera denguna torga pa la so cellebración

En concretu, faise referencia al artículu 20.y de la Llei 4/2015 de 6 de marzu d’atención integral en materia de drogues y bébores alcóliques, según el cual “nun se permite la vienta, suministru, publicidá o consumu de bébores alcóliques en centros de les alministraciones públiques”.

Dende la Fundación Asturies XXI entienden que la llexislación asturiana al respeutu exime a la sidre de recibir el mesmu tratu que’l restu de bébores alcóliques, y afirmen que “consideramos que foi por ello que, dende la so aprobación, enxamás nun foi aplicada a la Primer Sidre L’Añu, realizándose nel Muséu del Pueblu d’Asturies con toa normalidá demientres les 8 ediciones posteriores a l’aprobación de dicha llei”.

De fechu, demientres esi periodu, nel Muséu del Pueblu d’Asturies diferentes organizaciones, partíos políticos y empreses, vinieron realizando dellos eventos nos que se consumíen bébores alcóliques -non solo sidre-, polo que cabría pidir responsabilidaes a la dirección del Muséu por permitiles, si efeutivamente se demuestra que’l consumu d’elles nes istalaciones del Pueblu d’Asturies ye illegal.

La situación llegó a facer apelligrar la continuidá del eventu, pero tres la presentación del pertinente Recursu d’Alzada, la Fundación Asturies XXI amuésase confiada en que finalmente se caltenga la so cellebración nel Muséu del Pueblu d’Asturies ya anuncia que, en casu contrariu, informará oportunamente del allugamientu alternativu.

Cabe reseñar que nes 13 ediciones de cellebración del eventu, enxamás nun se rexistró dengún incidente públicu, nin se riquirió intervención policial nin asistencia sanitario, y los daños materiales causaos nel MPA reduxéronse a daños en reposabrazos d’un bancu, una portiella y un dispensador de papel d’un bañu; siendo asumíos los costos del so arreglu pola Fundación Asturies XXI

La Fundación Asturies XXI presentó Recursu d’Alzada énte l’Alcaldía de Xixón por que reconsidere la decisión y en función de l’amplia argumentación apurrida, permita la realización de la XIV Primer Sidre L’Añu nes feches y espacios solicitaos pola Fundación Asturies XXI. Nel recursu presentáu recuerden que la Primera Sidre L’Añu ye ún de los pocos eventos declaraos d’Interés Social’ pol conceyu de Xixón, tando venceyada la so cellebración al Muséu del Pueblu d’Asturies, que la cultura asturiana de la sidre ta declarada Bien d’Interés Cultural pol Principáu d’Asturies en 2014 y a la espera de ser reconocida esti añu como Padremuñu Inmaterial de la Humanidá pola UNESCO y que la Primer Sidre L’Añu ye una espresión fundamental de dicha cultura asturiana de la sidre en tolos sos aspeutos.

Por si acasu, tan buscando un allugamientu alternativu a la XIV Primer Sidre l’Añu, pesi al pocu marxen temporal col que se yos notificó oficialmente’l resolvimientu negatívu el 19 de febreru, pocu más d’un mes anantia de les feches de cellebración. La Fundación agradez nesi sen el sofitu y conseyu que recibíu dende’l mesmu Ayuntamientu Xixón, y mui concretamente dende la Conceyalía de Cultura y la FMCDUP, dende diverses entidaes como Divertia, la Fundación Caxa Rural de Xixón, la Cámara de Comerciu de Xixón, asociaciones de vecinos como la de Roces, ya inclusive d’otros conceyos asturianos que s’ufiertaron como see de dichu eventu.

En cualisquier casu, aporfien, “ye la voluntá d’esta Fundación Asturies XXI la cellebración nesta Selmana Santa de la XIV Primer Sidre l’Añu nel Muséu del Pueblu d’Asturies, y de nun ser asina, nun espaciu alternativu que dea continuidá al eventu, a la espera d’un cambiu d’actitú que permita recuperar lo más aína’l so allugamientu orixinal, natural y específicu nel Muséu del Pueblu d’Asturies”.

Llucía F. Marqués