L’Academia de la Llingua Asturiana (ALLA) entama’l 14 de marzu una xornada d’alcordanza y reivindicación de Conceyu Bable, abriendo con ella un añu nel que’l mediu sieglu d’aquella asociación va marcar l’axenda del asturianismu cultural y llingüísticu.

Baxo’l títulu “Xorrecíes tán les manes. Mediu sieglu de Conceyu Bable na perspeutiva de l’Academia de la Llingua Asturiana”, la xornada conmemorativa que programa l’ALLA va cuntar con dalgunes ponencies, una mesa redonda, la presentación d’un videu y una amuesa de música en direuto.

Los actos van celebrase nel salón de la Biblioteca Ramón Pérez de Ayala, n’El Fontán (Uviéu), el xueves 14 de marzu. A les cuatro la tardi Xose Antón Glez. Riaño y Pilar Rubiera aniciarán l’actu, proyectándose darréu el vidiu commemorativu “Xorrecíes tán les manes” realizau por Inaciu Galán. A ello seguirán tres ponencies sol tema, finando l’actu con una mesa reonda y la actuación musical de Xaime Martínez y la familia tradicional cola so revisión del Nuevu cantu Astur.

La entrada ye de baldre hasta enllenar les butaques.

Alberto Rodríguez

This work is licensed under a Creative Commons Attribution 4.0 International License.