Los colexos afeutaos son les Escueles Blanques d’Uviéu, el C.P. José Bernardo de Llangreu, el CEE Santullano y el C.P Vega de Guceo de Mieres y La Gesta d’Uviéu.
La situación de los comedores públicos nos colexos solucionaríase si el serviciu fore de titularidá pública.
La quiebra de la empresa qu’atendía los comedores de cinco colexos públicos prevoca’l caos: d’un díe pa otru les families tienen qu’escoyer ente carecer una xubía de los precios de fasta’l 50% o que los nenos tornen a casa a les dos, a la salida del cole, lo que dificulta cuando non torga la conciliación familiar y xenera falta de tresporte’n dalgunos de los cientros. Per otru lláu, tampoco ta clara la situación coles nómines de les trabayadores (cocina y vixilancia), n’algunos casos pendientes de cobrar.
La nueva empresa que se fae cargu de los comedores foi escoyía con priesa, pa que les escolines y escolinos nun quedaren ensin un serviciu básicu, lo que tuvo comu resultáu inmediatu una suba del preciu del menú diariu. La circular d’aniciu de cursu afita en cuatro euros el preciu del comedor por díe, seique’n dellos centros el preciu ya sobrepasaba esa llende. Agora pasa perriba los 6€, llegando’n dalgún casu a los 8’75 €.
Esta situación llevó a munches families a solicitar la baxa del serviciu de comedor, ante la imposibilidá d’asumir el sobrecoste, lo que tamién ta xenerando problemes nos centros pola xestión del tresporte escolar, al nun haber autobuses abondos pa cubrir la nueva demanda.
Casos como esti, destaquen dende SUATEA, nun se daríen si la Conseyería retomare la xestión direuta de los comedores, tando atendíos con personal de cocina pertenciente a l’alministración. Nos colexos públicos onde’l serviciu ye de titularidá pública, amás de salir más baratu, la calidá ye mayor.
Alberto Rodríguez
This work is licensed under a Creative Commons Attribution 4.0 International License.
