Ocho de Marzu, muncho entá polo que lluchar. Pero… espera ¿Lluchar pola muyer o pola muyer trabayadora? Porque verás, nun ye esautamente lo mesmo. Depende de comu veas el feminismu, la cita ye’n Mieres o en Xixón, eso si, a les siete la tardi. La pista pa decidir, mirar quién les convoca
Na II Conferencia Internacional de Mujeres Socialistes realizada en Copenhague en 1910, Clara Zetkin, cabezalera de la mesma, propuso y aprebóse la cellebración del “Día de la Muyer Trabayadora”, qu’entamó a cellebráse l’añu viniente, el 19 de marzo de 1911, n’Alemania, Austria, Dinamarca y Suiza. La movilización ñaz, poro, nel senu del entós ñaciente movimientu obreru femenín -les muyeres continuaben ensin denguna llei que les amparare, frente a los sos compañeros homes, ca vuelta más sindicaos y organizaos- y dientro un marcu puramente de clas.
Na que ver con empresaries felicitándose con llazos moraos na portada’l periódicu del sistema, nin con polítiques de postín aprofitando la fecha pa salir na semeya. L’8M ye una cuestión de xéneru pero tamién una cuestión de clas y hai quien quier vendénoslo comu otra cosa. Quitar d’esta fecha l’apellíu “trabayadora” y convertir el feminismu nuna moda, ye mui prautico pa vaciala de conteníu y desactivar la so carga revindicativa.
Asina que ¿Por qué se convoca un manifestamientu’n Xixón, a la mesma hora que l'”oficial” de Mieres? Porque nun tien xacíu, albidren los convocantes de la movilización alternativa en Xixón, salir a reclamar meyores de la man de quienes pueden implementales y nun lo faen. Porque desfilar al par de los responsables de la tremendamente precaria situación de les muyeres trabayadores n’Asturies ye tolo contrario a lluchar polos sos drechos.
Nel Dos Santos
This work is licensed under a Creative Commons Attribution 4.0 International License.
