La falta de planificación del gobiernu d’Asturies al presllar les térmiques ensin tener previsto otres formes de producción d’enerxía eficientes y llimpies fae que ya dependamos d’España (tamién) pa tener enerxía
Llamáronlo descarbonización. Al preslle en 2021 de les centrales térmiques de Narcea y Lada sumóse la parada va más d’un añu de La Pereda, con Soto Ribera esperando pol preslle definitivu. Dieron la esculpia de la necesidá d’utilizar fontes d’enerxía más ecolóxiques, pero escaecieron tener un plan alternativu de producción enerxética que fore compensando l’abandonu de los combustibles fósiles. De fechu, la principal alternativa que proponen ye ecolóxicamente tantu o más dañible qu’ellos: los parques eólicos, auténticos cementerios de páxaros que convierten n’ermos grandes zones naturales, finando cola so biodiversidá.
El resultáu, una Asturies que pasó d’autoabastecese y vender enerxía a depender d’España a cubrir les sos necesidaes. Nun ye casual, na Planificación de la Rede de Tresporte de Lletricidá 2021-2026, el “Ministeriu pa la Transición Ecolóxica” ya preveía pa finales de esi periodu un cambiu nos tradicionales fluxos d’enerxía y nel mapa de previsiones Asturies ya dexaba de ser un potencia esportadora y pasaría a ser importadora. Les previsiones quedaron curties, ya en 2024 Asturies ya nun ye -tampoco no enerxético- autosuficiente.
La perda de soberanía d’un pueblu, ya seya alimentaria, enerxética o política, tien como consecuencia más direuta la imposibilidá de decidir el so futuru llibremente, creando dependencies de les que ye abegoso desfacese. Asturies ye agora, gracies a les polítiques socialistes, un pocu menos llibre.
Llucía F. Marqués
This work is licensed under a Creative Commons Attribution 4.0 International License.
