El 23 d’Abril aporta a Xixón el Tour”la vida Sigue igual” , con paraes en Carancos, Avilés y L’Infiestu
“Cuando un mineru nun canta
al son de la regaera,
o ye que’l tayu ta duru
o restalla la maera”
La música en vivo y el cantar son ferramientes claves d’afitamientu de les rellaciones humanes, de construcción identitaria y emocional, de salú mental, teniendo especial valor la música tradicional y popular propies y ayenes como exe fundamental d’espresión individual y coleutiva. Col trabayu de los últimos años, comprobemos qu’esta capacidá de la música pa crear espacios positivos de rellación sigue intauta, pero precisa d’espacios dignos.
La evolución de les nueses sociedaes incapacita, dende’l paternalismu, la participación del ociu y la cultura propia nesta franxa d’edá, desprestixando tamién profesionalmente l’oficiu de músicu popular, gremiu fundamental nes nueses cultures a pesar de nun ser valoraos con condiciones de trabayu dignes y espacios de música cercanos, regulares y algamables económicamente, entá siendo reconocíu poles nueses sociedaes como una figura apegada dafechu a la vida.
Agora qu’artistes como Rodrigo Cuevas trunfen ente la modernidá como herederos llexítimos d’un patrimoniu de valor incalculable , devolve-yos a les persones mayores los sos espacios musicales sedría una prioridá, aforrando asina tamién presupuestos públicos cargaos de gastos farmacolóxicos prescindibles y al serviciu de plantegamientos sanitarios d’intereses opacos. Lo bono sedría recuperar la función social d’estes músiques y esos músicos escapando de les intervenciones puntuales, aneudótiques y voluntaristes: crear activos de salú, tal que yá se fai en delles estratexes institucionales d’atención comunitaria.
Dende ehí, sedría prioritaria la construcción de proyectos de salú comunal venceyaos a la hestoria musical coleutiva y la cultura popular, poniendo voz asina tamién a un sector silenciáu y con muncho que dicir: el de los homes y muyeres mayores.
Lluchar escontra la degradación de la vida na última etapa, la de la vieyera, construyir espacios musicales d’intervención social y de puxu pola salú -humanos- en collaboración colos y coles trabayadores de los centros, asociaciones y organizaciones, tendría de ser yá una prioridá pa les alministraciones y tamién pa les y los músicos.
Anque sedría importante midir el riesgu de crear namás espacios artísticos d’intervención, valorando la prioridá de venceyar el desenvolvimientu al texíu asociativu y comunal qu’hai yá.
De nun facelo, una parte de los nuevos profesionales de la música o de la musicoterapia, pueden cayer en plantegamientos que nos arrastren a espacios d’intervención individuales y asistencialistes, con complicidaes amplies ente les tendencies bioloxicistes y farmacolóxiques.
Asina vamos da-y importancia a los determinantes sociales pa la salú, con un altu índiz de probeza estructural y marxinalidá. Tamién l’impactu positivu que la música supondría pa les persones que nun pueden disfrutar un ociu de pagu.
Podemos cantar namái, porque tenemos los cantares, non soluciones a los problemes estructurales de la soledá. Ésti yá ye un problema de salú pública que tenemos que tratar ente toos y toes aldericando honestamente respeuto a la variedá causes que puede haber.
Vamos facenos amos y ames una vegada más de los itinerarios de salú, recetémonos cantares y música en vivo.
Dignifiquemos les nueses vides, porque vivir nun ye durar.
Alejandro Luaces
Músicu
This work is licensed under a Creative Commons Attribution 4.0 International License.
