A Noelia Ordieres, conceyala d’IU, un vasu sidre abulta-y “un oxetu que padrocina’l consumu d’una bebida alcoólica”. Suponemos que nun sintió falar na so vida de la Cultura de la Sidra Asturiana
Llucía F. Marqués
L’edil d’Esportes y presidente del Patronatu Esportivu de Xixón, Jorge Pañeda, tuvo una prestosa idega pa premiar a los participantes na media maratón Villa de Xixón con daqué más propio, guapo y si quies, útil, qu’una medalla más que dexar aferruñando en caxón: un vasu sidre grabáu.
Sicasí, la idega nun foi tan bien recibía comu cabía esperar. Dalgunes crítiques en redes y la protesta de Noelia Ordieres, conceyala d’IU, que considera que “Tamos ante un eventu esportivu, el reclamu o aliciente nun pue ser la entrega d’un oxetu que promociona’l consumu d’una bebida alcoólica”.
En primer llugar, sospresa, a un eventu esportivu naide va col reclamu d’una medalla en si mesma, de quedar en bona posición, si, pero’l valor físicu d’una medalla qu’asonsaña ser de material noble ronda pente’l pocu ya’l res.
En segundu y más emportante, un vasu sidre ye una seña identitaria de los asturianos, reflexu d’una cultura sidrera a piques de ser considerada Padremuñu Universal de la Humanidá y muncho más representativo de Xixón qu’un reondel rellumante con llazu, en munchos casos con bandera del reinu d’España.
En terceru, nun se si esta señora paró a camentar en cual ye’l premiu de les grandes prebes esportives del mundiu mundial: una copa.
Ehí lo dexo.
This work is licensed under a Creative Commons Attribution 4.0 International License.
