La Conseyería d’Educación y Cultura vien de facer pública la convocatoria de los Premios Escena Cultural Asturiana, que tienen l’envís de reconocer el llabor de quien col so enfotu y talentu da vida y prestixu al asturianu nos campos de la lliteratura, la música y el teatru.

En total, son diez galardones. Na so 45 edición, convócase’l Premiu Xosefa Xovellanos de novela n’asturianu pa obres de tema y cadarma llibres que seyan inédites.

Nel tarrén de la poesía, El Premiu Xuan M.ª Acebal  lleva 30 años premiando obres poétiques n’asturianu. Pa presentase la obra con una estensión mínima de quinientos versos.

Tamién 30 años cumple’l premiu Máximo Fuertes Acevedo, que reconoz la calidá d’ensayos n’asturianu.

Más nuevu ye’l Premiu María Josefa Canellada de Lliteratura Infantil y Xuvenil n’asturianu pa obres de lliteratura infantil o xuvenil —con independencia de que seyan noveles, compilaciones de cuentos, poemarios o obres de teatru—, que ta na so diecisiete edición, una más que’l Premiu Alfonso Iglesias de cómic n’asturianu pa obres d’estilu,  que puen abarcar el desenvolvimentu d’una historia sola o un conxuntu d’histories.

Namás cuatro años tien el Premiu Florina Alías a la Meyor Traducción al asturianu, que busca distinguir al traductor, traductora o traductores d’obres orixinales, de calter lliterariu y non lliterariu, y editaes (en formatu papel o en formatu dixital) y difundíes nel añu 2023. Los mesmos años lleva cellebrándose ‘l Premiu Enriqueta González Rubín de Narrativa moza en llingua asturiana, pa  noveles o escoyetes de cuentos, escrites en llingua asturiana.

El teatru tien dos premios, el de Teatru profesional, Nel Amaro, que tien siete ediciones ya’l II Premiu Pachín de Melás de Testos teatrales n’asturianu.

Fuera l’ámbetu estrictamente lliterariu, rescampla’l XIV Premiu Camaretá al Meyor Cantar . Al premiu van poder presentase cantares de cualquier xéneru con lletra y música orixinal y cantares de cualquier xéneru con lletra orixinal sobre melodíes yá existentes. Nun casu y n’otru, editaes y difundíes al públicu a lo llargo del añu 2023 y hasta la fecha de la convocatoria de la edición presente. Cada solista o grupu musical interesáu va poder presentar al premiu un cantar namás.

El plazu de presentación de les obres acaba’l 27 d’abril del 2024 pa tolos premios sacante’l Camaretá que ta abiertu hasta’l 12 de mayu. El fallu de los ganadores, como vien siendo vezu, va conocese nos caberos meses del añu.