Nun ye una cellebración casual nin inocente, implantar el flamenquismu -asonsañando a los andaluces, ridiculizando al so pueblu al tiempu que se somorguia’l nuesu- lleva siendo una estratexa d’aculturación patente dende los tiempos de Pachu

Recién salios de la chiflaura penitente de la Selmana Santa ya tornamos a ver perdayuri anuncies de “Feries d’Abril”, y nun son de ganao -vamos aguantar el chiste fácil, que ta ehí-. Ye más fácil topar onde retorcese por soleares que ver baillar un pericote, y non porque esista demanda, nin una comunidá andaluza que lo promueva con señaldá de la so cultura. 

¿A qué vien esi enfotu flamenquista? Dende l’asturianismu denúnciase lo evidente, les feries d’abril son un síntoma más d’un andanciu gafu que percuerre Asturies y que menacia con finar cola identidá propia del pueblu: l’Antiasturianismu Cosmopaletu. Estes feries son a cencielles un pasu más nel camín d’aculturización ya españolización d’Asturies, la mesma fiebre qu’inclui los brindis con vinu español, llama bodegas a los llagares y pretende sacar les vaques de los pueblos y que tien pente los sos efeutos secundarios l’enclín a dedicar los presupuestos municipales a una cultura ayena, al tiempu que -comu se demuestra coles torgues puestes pa la cellebración tradicional de les espiches o colos pilancos alcontraos pa entamar enventos comu la Primer Sidre l’Añu- s’afuega la propia. Un vasu sidre considérase una menacia, pero les restriciones alministratives nun estorben, sicasí, pa servir rebujitos y vestise a pintes.

Dende Andecha Astur coinciden con esti analís y curiense d’amiestar que nun se trata de denguna fobia escontra los andaluces. De fechu, en rialidá’l propiu pueblu andaluz vese perxudicáu por esi seudofolclor que los asonsaña, elleváu a la categoría de sencia ultraespañolista. 

Llucía F. Marqués

This work is licensed under a Creative Commons Attribution 4.0 International License.