Ataques racistes a dos neñes asturianes por un vidiu nel que destaquen espresiones n’asturianu
Na grabación, espublizada n’X, dos amigues van comentando “soi asturiana y nun digo (…) digo (…)”, un formatu baxo’l qu’hai fargatáu de videos nes redes, con munchos “gústame” y denguna polémica. ¿Cual ye l’asuntu entós? pues qu’una d’elles ye prieta y qu’hai muncho faltosu inorante pel mundiu.
Los ataques racistes nun entardaron n’apaecer, poniendo en duda l’asturianidá de la rapaza. Afortunadamente, las muestres de sofitu a esta asturiana entardaron menos entá y la refuga a los comentarios racistes foron talos que les denuncies presllaron ya a delles de les cuentes atacantes.
Dende InfoAsturies queremos dar un aplausu a estes moces por conocer y defender la nuesa llingua y a los que nun s’enteraron tovía, que yos quede mui nidio, asturianos son los que viven n’Asturies y la defenden, independientemente del collor o cualisquier otra consideranza.
De fechu, n’ámbetos tan asturianos comu la tonada, l’echar la sidre, los esportes tradicionales, les bandes de gaites o les clases d’asturianu, son ca vuelta más abondoses les persones d’orixen foriatu qu’abracen con ciñu y enfotu la nuesa cultura, llingua y tradiciones; ellos y elles merecen el títulu d’asturianos más que munchu babayu qu’anda sueltu cellebrando, por casu, feries d’abril y saetes. Como diz el cinco vegaes Campeón d’Echaores de Sidra d’Asturies y cantante de tonada d’orixen senegalés, Salvador Ondó “Un asturianu naz onde-y da la gana”. Afayaivos.
Abro hilo:
Ayer subí este vídeo con mi mejor amiga con la intención de entretener y pasar un buen rato: pic.twitter.com/CYtd26Vywo
— Daniella⚡ (@daniellaalh) April 24, 2024
Alberto Rodríguez
This work is licensed under a Creative Commons Attribution 4.0 International License.
