Enfrentamos otru Díi de les Lletres Asturianes llastráu poles falses promeses, los brindes al aire y los “avances” valeros, pero cola brenga intauta pa reclamar, mañana a les doce n’Uviéu, otra vegada, la Oficialidá

Que lloñe tamos d’aquella mani del 2019, la cabera, decíen  y d’aquella otra cabera, n’ochobre del 2021, a la que siguió l’alloriante temporada del nin si nin non nin tolo contrario. Que lloñe de les promeses que llevaron a Adrián Barbón a la presidencia, aquel “Oficialidá, agora si”. Que cerca de que la deceición nos lleve a quedar en casa, a danos, a dexar de glayar, l’asturianu llingua oficial. 

Menos mal que somos necios y mañana volvemos a la cai, al manifestamientu que lleva camín de mediu sieglu desixendo’l respetu de los drechos llingüísticos de los asturianos y por ende, la Oficialidá de la llingua peles cais d’Uviéu.

Ya va unos años que’l tradicional manifestamientu nun se cellebra anantes de la xunta estraordinaria añal de l’ALLA, perdiendo asina la oportunidá de que los asturianos aplaudieren a los representantes de la so llingua y reclamaren la oficialidá directamente a los políticos asistentes. Esti añu, como los caberos, los manifestantes  saldrán de la Estación del Norte el sábadu a les doce, de onde aportarán a la plaza la Catedral, aú tendrá llugar l’actuación de dellos músicos pa poner el ramu a la revindicación llingüística. 

Entantu, nel escenariu políticu asturianu, l’espectáculu continúa.

Adrián Barbón aprofita’l so practicamente únicu día al añu d’usar l’asturianu pa llamar a “Ensin complexos nin miéu, cumplir cola Constitución pa garantizar el futuru de les llingües d’Asturies“. Ensin complexos, diz l’home que llegó al poder prometiendo una oficialidá discreta y “amable” y que se conforma con aprebar  años depués unos míseres “criterios llingüísticos sobre l’usu del asturianu y l’eonaviegu na Alministración autonómica” que faigan por cumplir una lléi de más de un cuartu sieglu.  Tamién prometió entamar a utilizar de magar esti añu los topónimos oficiales, que lleven siéndolo dende l’entamu’l so mandatu y permite a los rapacinos d’infantil sentir la so llingua materna una escasísima hora y media a la semana. Matóse.

Cuasi na mesma llinia y siguiendo la estela marcada pol PSOE de pasar de represor llingüísticu a figurante defensor, el presidente del PP d’Asturies, Álvaro Queipo, fae por esblanquiar la tradicional refuga popular de tolo asturiano y declara que tenemos que promover y protexer les llingües asturianes. El cabezaleru popular llega a afirmar que’l PP ye l’únicu partú “nel caberu cuartu de sieglu que s’esmoleció pola supervivencia ya’l fortalecimientu” del asturianu”. Cuasi na. 

Carolina López, de VOX, fala mui claro y entra de lleno na crítica surrealista  “El PSOE quier agora adoctrinar a los neños de 3 a 6 años, nun conoz llímite na imposición llingüística”. Maxín nun yos falta, pero polo menos hai que reconoceyos el méritu de la sinceridá. 

Frente a toos ellos, Andecha Astur, l’únicu partíu que dende’l so ñacimientu, con fechos amás de con pallabres, ensin paréntesis nin duldes, defende l’asturianu, perafítase na so vindicación d’una Oficialidá completa, de plenos drechos pa la nuesa llingua nacional y fai un llamamientu a la coherencia “frente a los discursos “amables” que namás pretenden contentar con migayes a la población y que de fechu lo  único que faen ye caltener la represión llingüística antroxada”.

Llucía F. Marqués

This work is licensed under a Creative Commons Attribution 4.0 International License.