Bonos díes, bona xente.

Alborecemos col cielu emborrináu, tando más escampláu na cordelera y fastera surocidental asturiana con unes temperatures que tan alrodiu de los 10ºC, rexistrándose nel puirtu Payares 3ºC.

Güei vamos tener nubosidá baxa que nun mos va dexar malpenes precipitaciones, sicasí n’estes primeres hores nos cordales del interior asturianu pue cayer dalgo d’orpín, el restu del día tará seco y nes zones altes ya puntos del surocidente tará poco nuboso o escampláu, abriéndose grandes claros o abancios nel restu al atapecer. Les temperatures camudarán poco con dalgo de nordés pela costa.

Mañana domingu baxarán dalgo les temperatures mínimes con dalguna xelada nes zones más favoretibles por mor del cielu escampláu. Durante’l día tendremos dalgo de nubosidá alta qu’empuercará’l cielu con tendencia a desaparecer pela tarde. L’aire del nordés pue ser dalgo molestu na costa y les temperatures másimes a pesar del sol camudarán poco, nun llegando en casi ningún lláu a los 20ºC.

El llunes la llegada d’una fondera borrasca pel atlánticu norte va dir camudando esti tiempu estable y de tarde yá s’esperen precipitaciones que sedrán más abondoses na metá ocidental d’Asturies, amás les temperatures aniciarán un bultable descensu faciendo que surda la nieve al finar el día perriba de los 700m.

Durnate’l riscar del martes paez que malpenes tendremos precipitaciones pero ellí onde se den sedrán en forma de nieve mui a baxo, tan solu perriba de los 300-400m. Ya pela mañana, n’alborada la llega d’un frente mos dexará precipitaciones más xeneralizaes, sobre too na fastera ocidental asturiana con una cota de nieve n’ascensu de los 400m de l’alborada a los 800-900m a partir del mediudía. Anque les precipitaciones nun sedrán nin mui frecuentes, nin mui abondoses cola posibilidá de dalguna truena dispersa que pue dexar dalgo de xarazu. Tamién hai que tar sollertes col aire gallegu que va soplar con fuercia en puntos de la costa y zones altes, amás mos dexará mui mala mar nel Cantábricu.

El miércoles paez que se profundizará entovía más la borrasca pero pola so posición málpenes mos dexará precipitaciones pero si mui mala mar con vientu gallegu racheado que mos dexará una sensación térmica mui baxa, sicasí na fastera más ocidental les precipitaciones puen ser dalgo más frecuentes y abondoses con una cota de nieve que seguirá siendo baxa, tando alrodiu de los 500m..

A partir del xueves paez que la borrasca mos entamará a empobinar vientu de componente suroeste polo que les precipitaciones van quedar retenies na vertiente sur de la cordelera, con nevaes n’ésta que puen ser abondoses perriba de los 1500m.

Los siguientes díes la situación sedrá mui asemeyada, sicasí’l cruce de dalgún frente pue dexanos dalgo más d’agua pero polo xeneral na mayor parte d’Asturies tendremos nubes ya claros o abancios con temperatures fresques.

Que paséis unos bones díes d’asuetu collacies ya collacios.

This work is licensed under a Creative Commons Attribution 4.0 International License.