Conceyu Abiertu pola Paz ya’l Movimientu 25 de Mayu convoquen actos de comemoración de la proclama soberanista del 25 Mayu y contra los actos militaristes españoles d’estos díis. Andecha Astur, que tradicionalmente llidera los actos d’esti díi, decide nun convocar pa favorecer l’asistencia al restu de convocatories, favoreciendo la xunidá

La reivindicación del 25 Mayu del 1808, como fecha hestórica na que la Xunta Suprema declaró la independencia d’Asturies y la Soberanía del Pueblu Asturianu, vese esti añu emporcada pola desaxerada esibición de fuercia militar desendolcada pol exércitu español n’Asturies estos díes, una esibición qu’enmarca a la perfeición na campaña de blanquiamientu y adoctrinamientu español que carecemos nos caberos tiempos, na que’incluso los mesmos centros escolares públicos tan dando cabida a actividades castrenses fuera llugar dafechu nun marcu académicu. 

Ye por ello que ye especialmente importante participar nes convocatories feches pa esi díi dende l’ámbetu asturianu, amosando la xunidá del pueblu asturianu na refuga d’esos actos españolistes ya en memoria de la proclamación de soberanía.

La primer cita ye a les diez y media na Sala Capitular de la Catedral d’Uvié el Movimientu 25 Mayu fadrá la ufrienda d’un ramu de lloréu comemorando la proclamación de soberanía del 25 Mayu de 1808. Darréu, de magar les doce y media, Conceyu Abiertu pola Paz convoca a aconceyar na Plaza’l Paragües escontra l’actu de les Fuercies Armaes españoles. Los horarios permiten acudir a les dos convocatories, polo que dende Andecha Astur consideraron contraproducente llamar a un terceru que nun fadría sinón esparder fuercies, lo contrario a lo que dende esti partíu lleven defendiendo va tiempu “revindicamos de nueu la necesidá de converxencia y xunidá del conxuntu del soberanismu/asturianismu de izquierda/progresista en propuestes lo más xunitaries posible qu’ufierten a la sociedá asturiana alternatives viables nes que poder enfotase y participar nel necesariu procesu de tresformación política y social que precisa’l nuesu país” argumenten, llamando a participar nos actos convocaos.

Llucía F. Marqués

This work is licensed under a Creative Commons Attribution 4.0 International License.