El 25 y 26 de Mayu Llaboral Centru d’Arte y Creación Industrial Xixón entama la prósima edición de primavera de LABShop, una cellebración multidisciplinaria qu’axunta arte, diseñu, creación, música, cine, charres y talleres, ufiertando una plataforma única pal intercambiu cultural y creativu, onde se van dar cita más de 61 puestos d’artesanos, diseñadores y creadores.
Les actividaes del sábadu van emtamar col alderique ¿Cultura en Asturies?, onde participarán reconocidos personaxes del sector cultural asturianu. A les 17:00 tamién podremos ver la retresmisión del programa Sentir Asturies, de RPA, en directoy a les 19:00 hores presentaráse l’antoloxía poética Surdiversu.
La tarde del sábadu va enllenase de música cola actuación d’artistes como Elena del Frade, un proyectu solista que funde’l pop intimista cola música sintética del xéneru lletrónicu y Love Feroz. Antes, a les 13:00, va actuar DJ La Viuda de Angelín.
Al otru día, dos nueves actuaciones, con Sandra Dee y Mediocre DJ y más propuestes, como l’alderique sobre la industria musical qu’entama Emerxentes o’l Cine en las fronteras d’Alex Galán y David Rodríguez.
Pa la reciella, va haber actividaes como playLAB. Esti espaciu efímeru ta dedicáu dafechu a un xuegu creativu, sostenible, colaborativu y analóxicu en familia. Ente les zones disponibles hai árees d’arte, pieces sueltes, zona de bebés, llaboratoriu d’esperimentación sensorial, y tinkering.
Amás, habrá interesantes talleres pa tolos gustos. Ente ellos, el taller de cestería ofrecerá una iniciación a la cestería tradicional en blima, guiando a los participantes na construcción d’una cesta cenciella dende’l fondu hasta los mangos. Per otru llau, el workshop de caligrafía y brushlettering, impartíu por Nacho d’Elduayen Radikal Art, va apurrir conocencies y técniques pa que los participantes puedan crear los sos propios diseños gráficos ya ilustrativos. Pero son munches más les propuestes disponibles. Amás, mientres tola fin de selmana, va tar abiertu l’accesu a les esposiciones del Centru d’Arte LABoral y será gratuitu. Ente les esposiciones destacaes ta la obra del artista Rodrigo Cueves.
Susana Sela
This work is licensed under a Creative Commons Attribution 4.0 International License.
