Un grupu de profesionales y empresarios y empresaries de diverses tendencies polítiques que trabayen n’Asturies posiciónense abiertamente a favor de la oficialidá nun Manifiestu nel que venceyen l’espoxigue económicu d’Asturies col sentir d’autoestima y de querencia polo propio que la Oficialidá acarretaría

Fasta agora son cientu cinco los que roblen esti manifiestu, pero confien en que la cifra xorrezca abondo nos prósimos díis. Son empresarios y trabayadores autónomos que desendolquen el so llabor n’Asturies y que poro tan mui en contautu cola sociedá asturiana, asina comu bien informaos del camín que lleva la economía del país. Ellos persaben que la reconocencia de los drechos llingüísticos trae apareyao ventayes pa la xeneración d’economía llocal y puesta en valir de la marca Asturies.

“La situación actual fai inviable vivir nelles o desendolcar la nuesa actividá profesional con toles garantíes cuando lo queremos facer facturando, faciendo publicidá, etiquetando los nuesos productos. La falta d’oficialidá xenera inseguridá xurídica y torgues alministratives de tou tipu. Nun hai otra forma, nun esiste otra solución que l’asunción del mandatu constitucional de la declaración d’oficialidá” declaren nel so escritu, afitando que pa ellos ye clave que se supere esta falta de protección del patrimoniu llingüísticu d’Asturies y de los drechos de les persones asturfalantes. 

Nel Manifiestu tamién se fae un llamáu a los partíos con representación na Xunta Xeneral pa qu’algamen darréu un alcuerdu, comu fexeron ya n’otros territorios va décades, afitando que d’esistir interés pela so parte nun sería complicao tirar p’alantre cola Oficialidá, reconociendo a la fin los drechos llingüísticos de los asturianos y asturianes. 

El formulariu pa roblar el Manifiestu de profesionales y empresarios pola Oficialidá sigue abiertu y recoyendo más sofitos. 

Alberto Rodríguez

This work is licensed under a Creative Commons Attribution 4.0 International License.