Algamar una ayuda a la dependencia n’Asturies lleva una espera de 316 díes, mui perriba de los seis meses de másimu marcaos llegalmente
L’ Imserso diz que 505 asturianos tan n’espera de les aides a la dependencia “ensin motivu”
Oficialmente, una solicitú d’aida a la Llei de Dependencia nun tien de sobrepasar el plazu de seis meses, 182 díes, en ser retrucada ya en casu de valorase positivamente, la persona dependiente entame a cobrar. Sicasí, acordies l’Istitutu de Mayores y Servicios Sociales (Imserso) n’Asturies la media ye bien superior, 316 díes ente que se presenta una solicitú y se recibe una rempuesta. Esta demora va medrando y nel caberu añu sumáronse 42 díes al tiempu mediu de tramitación.
Entantu y non, les solicitudes siguen medrando añu a añu, comu ye de xacíu viendo l’avieyamientu de la población. De les 47.942 solicitaes fasta agora, 40.830 foron evaluaes, de les que 32.220 asturianos recibieron el reconocimientu del so drechu a prestación o serviciu.
Namás nel mes de mayu, la Conseyería de Drechos Sociales y Bientarrecibió 1.121 solicitudes. Esi mesmu mes tramitáronse namás 595 altes nel Sistema d’Atención y Ayuda a la Dependencia (SAAD).
D’ente los que tan en llista d’espera destaquen los 505 asturianos que lleven más de seis meses d’espera ensin motivu dengún.
L’Imserso insiste na necesidá de tener en cuenta l’avieyamientu de la población, ya que la previsión lleva a que los asturianos potencialmente dependientes por edá seya del 3% del censu, un total de 183.865, imposible d’atender col actual nivel de financiación y personal.
Llucía F. Marqués
This work is licensed under a Creative Commons Attribution 4.0 International License.
